КТК арнасындағы жаңа маусымның шымылдығын «Жат туыстар» телехикаясы ашады. 70 сериядан тұратын киноэпопея КТК арнасының тапсырысы бойынша түсірілген. Бұл фильмде мелодрама, детектив пен экшн жанрының элементтері бар. Сондықтан болар әр сериясы шытырман оқиғаға толы.

Фильмде ағайынды екі жігіт әкелерінің қара шаңырағына қырық пышақ қырылысады. Зәулім үйден дәмелі абысындар да екі бауырдың арасына от жағып жағдайды ушықтырады. Баспанаға бола бауырлар бір-біріне қастық қылып кісі өлтіруге дейін барады. Бауырмалдықты емес, байлықты ойлаған ағайындардың бұл әрекетін режиссерлар мейлінше шынайы көрсетуге тырысқан.

Ал жастарға арналған «Қиын шақ» фильмі қарашадан бастап көрсетіледі. Он екі сериялы телехикая – КТК арнасының төл туындысы. Фильмде мектеп оқушыларының бастан кешкен оқиғалары, ұстаздар мен ата-аналардың қарым-қатынасы суреттеледі. Оқушылар арасындағы әлімжеттік, бала махаббат пен қызғаныш барлығы «Қиын шақ» киносында қамтылған.

Андрей Сухоногин, «Қиын шақ» телехикаясының режиссері:

- Мектептегі әлімжеттік қай кезде де болған. Мен оқып жүргенде де, қазір де бар. Жасөспірімдер арасындағы өшпенділік, балалық бәрімізде болды. Бірақ есейгенде тентектік басылып, бәріміз ақымақ болғанымызды түсінеміз. Фильмде осы көріністер де қамтылған.

Жаңа маусымның тағы бір жаңалығы – шытырман оқиғалы «Інжу» драмасы. КТК арнасының шығармашылық тобы түсірген фильмде басты кейіпкер Інжу деген қыздың бастан кешкен қилы тағдыры баяндалады. Бай баласынан зорлық көрген басты кейіпкер шындыққа жету үшін көп қиындықты бастан өткереді.

Зухра Сайпи, актриса:

- Шынымды айтсам, бұл рөл маған оңай болған жоқ. Кейіпкерім көп қиындықтарға тап болады. Оны сөзбен айтып жеткізу қиын. Ауыр жағдайға тап болса да, жеңілген жоқ. Мықты қыз.

Ал 10 сериялы «Сарбаз» фильмі төрт жігіттің жігіттің тағдырынан құралған. Мінез-құлқы мен әлеуметтік жағдайы әр түрлі азаматтар әскер қатарына бірге қабылданып, нағыз өмір мектебінен өтеді. КТК арнасы ұсынатын төрт телехикая да қазақ тілінде көрсетіледі.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!