Айрандай ұйыған әулеттің ала тайдай бүлінуіне бірден бір себеп – зәулім үй. Әкеден қалған қара шаңырақты бөлісе алмаған ағайындар арасында алауыздық орнап, жақындар жатқа айналады. Мұрагерлікке таласқандар күнде ұрыс-керіс шығарып, бір-бірінің ізін аңдуға көшкен. Тіпті таласқа түскен үйге бола кісі өлтіруге де дайын.

Фильмдегі басты кейіпкер - Баян. Үлкен әулеттегі барлық дау-дамайдың бәрі 18 жастағы бойжеткеннің басынан өтеді.

Захира Рақымжан, Баянның рөліндегі актриса:

- Аған ерекше рөль. Мұндай оқиға өмірде болады деп ойламаймын. Балалық өмірден енді қадам басып жатқан қыз қиындыққа тап болады. Бала тұрмақ, үлкен кісілер көтере алмайтын жағдайлар басынан өтеді. Бірақ Баян пысық, ақкөңіл, адал қыз, тауқыметті жеңіп шығады.

Баян үшін сүйіктісі де талай төбелестің ортасына түсіп қан-жоса болады. Ал Асқардың рөлін сомдаған актер экшн элементтері бар фильмдерге түскенді «бала кезімнен армандайтын едім» дейді. Сондықтан бұл кейіпкерді сомдау аса қиын болмапты.

Бексұлтан Әкімжан, Асқардың рөліндегі актер:

- Асқардың өзіне тән бір мінезі бар. Соны ашу – міндетім. Және түсрілім төрт айға созылады деген соң келістім. Себебі, сериал алдыңғы сериалға қарағанда ұзағырақ. Өзіме де тәжірибе жинап, оған қоса қызықты болады деген соң келістім.

«Жат туыстар» фильмі 70 сериядан тұрады. Мелодрама, комедия, трагедия мен экшн жанрының элементтері бар. Әр сериясы шытырман оқиғаға толы отандық киноны әр аптаның дүйсенбісі мен бейсенбісі аралығында КТК арнасынан сағат 17.00-де көре аласыз.  

Бізді Youtubе-та қараңыз! Бізді Facebook-та, Instagram-да, Telegram-да оқыңыз!