Бурабайда осыдан үш жыл бұрын жылу қазандығы салынғанда, Оқжетпестің тұрғындары пәтерлерінде өмір бойы жағып келген мұржалы пештен кұтылдық деп қуанған. «Содан бері қыстай бойымыз бір жылынбады», - дейді олар. Жылуға жарымай келген тұрғындар алдағы қысты тағы да үреймен күтіп отыр.

Оқжетпес ауылын толық орталықтандырылған жылу жүйесіне қосу курортты аймақтың экологиясын жақсартуға жасалған. Бірақ тұрғындардың жағдайы жақсара қоймапты. Биыл тағы жылу азабын тартатын түріміз бар деп отыр олар. Өңірде әлдеқашан басталған жылу маусымы мұнда әлі жетпеген. Жаураған тұрғындар жылу ақысын төлеуден жаппай «бас тартамыз» деп шулады.

Алтынбай Жандарбеков, Оқжетпес ауылының тұрғыны:

- 5ші қазаннан бүгінге дейін жылу болған жоқ. Енді қазір қалай ақшасын төлемейміз? Бұны алдымен шешіп алу керек. Төлемейміз! Не үшін ақша төлейміз?

Бұрынғы жылдары болмашы жылуға амалсыз төлеп келген. Әкімдік сот арқылы өндіріп алыпты. Енді биыл оқжетпестіктер қалай да толық жылу беруін талап етпек. Сондықтан жиынға басшыларды шақыртып ортаға алды. Бурабай ауданы әкімінің орынбасары Достанбек Есжанов жиынға келгенімен, бірде-бір сұраққа тұщымды жауап айта алмады. Жауапты жылу қазандығының басшысы беріп тұрды.

- Жылуды 10 күн күттік!

- 10 күн емес, 1-інен бастап жылусыз отырмыз. 

Сайран Құлжанов, «Бурабай Тазалық» МКК директоры:

- Бір апта бұрын біздің мамандар су айналымын реттейтін бұранданы біреулердің жауып тастағанын анықтады. Аяғымыздан тік тұрып соны іздеп тауып, ретке келдірдік. Оның үстіне курорттағы демалыс орындары мен зәулім үйлер су айдайтын насос қойып, жылу қысымына кедергі келтіріп тұр. Бүгіннен бастап жылу бердік. Енді қадағалап отырамыз.

Жылу берілді десе де, пәтерлерге әлі жетпеген екен. Үйде ғана емес, мектеп пен балабақшада да балалардың тоңып отырғаны жанымызға батты дейді жұрт. Ал амалы құрыған местеп басшылығының сабақ уақытын 30 минутқа дейін қысқартуына тура келген.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!