Бұл жерде көзі көрмейтін зағип та, таяғына сүйенген жандар да, көпбалалы ана да бар. Олар қоғамдық көлікте жүруге жеңілдік беретін картаны алуға келгенмен, үш күннен бері құжат беретін жалғыз терезеге жақындау қиындық туғызған. Тар жерде, көпшілік арасында ауа жетпей жүрегі қысылған қариялар да бар. «Мұндай жолмен берілген жеңілдігі құрысын» - дейді.

Владимир Паршин, Екінші топтағы мүгедек:

- Масқара! Бір ғана терезе жұмыс істеп тұр. Қараңыз, қаншама адам. Қариялар, соқырлар тұр. Үлкенге деген құрмет осы ма? Мұндай жеңілдігі құрысын! Халық көп екенін біледі. Жөндеп ұйымдастырмай ма?

Қоғамдық көліктегі жаңа төлем жобасы енгізілісімен, тариф қымбаттайды. Қолма-қол есеп айырысатын болса, ересектерге 150, балаларға 70 теңге төлемек. Ал әрбір жолаушы көлік картасын қолданса, бұрынғысынша 80 және 40 теңге мөлшері сақталмақ.

Бұл қарбалас – аталмыш жаңа жобаның алдындағы әзірлік. Көмек көрсетілетін санаттағы тұрғындардың барлығы қарашаның 1-не дейін жеңілдік картасын алуы тиіс. Бірақ көрсетілген қызмет түрінің сиқы осы. Билеттерді әзірлеуші электронды жүйе операторы межелі мерзімге үлгермеуіміз де мүмкін дейді.

Мәулен Тахиров, «KOKSHE  BUS TOLEM» ЖШС директоры:

- 1ші шілдеден құжат қабылдадық. Бірақ қолдағы ақпаратты базаға енгізуге мүмкіндік болмады. Тек қазанның 15-і ғана бұл жұмыс яқталды. Әрине, уақыт аз қалды, үлгермеуіміз әбден мүмкін. Бүгін жұрттың ығы-жығы болып жатқаны да сондықтан.

Алғашқыда жеңілдік 13 түрлі санаттағы адамдарға қарастырылса, қазір ол санаттағылар 15-ке жеткен. Яғни, жоспарланған 1,5 мың адамның орнына  9200 адамға жеңілдік картасы әзірлену керек.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!