Бүгінде елімізде көпбалалы отбасылар табысына қарамай, жаңа жылдан бастап жаңа жәрдемақы алып отыр. Төлемнің ең жоғары мөлшері – 75 мың теңгедей. Жәрдемақының дәл осы мөлшердегі көлемі 7 және одан көп баласы барларға да тиесілі.

Бірақ 8-ден көп перзентті бағып отырғандар жәрдемақыға күн көру мүмкін еместігін айтып, бірнеше рет еңбек министріне шағымданыпты. Сол талапты ескерген Үкімет әлеуметтік төлемді өсіретін болды. Енді әр балаға  төрт айлық есептік көрсеткіш негізінде, яғни 10600 теңге төленеді.  

Біржан Нұрымбетов, ҚР Еңбек және халықты әлеуметтік қорғау министрі:

- Қазіргі уақытта 7 баладан әрі қарай біркелкі мөлшерде жәрдемақы жоқ. Сондықтан енді 8 және одан да көп балалы отбасыларға да біркелкі жәрдемақы беру қарастырылып отыр. Мысалы, 8 балаға 74 мың емес, 85 мың теңге, 10 балаға – 106 мың теңге, 15 балаға – 159 мың теңге төленеді.

Министр айтқан жәрдемақының жаңа мөлшері мынадай: 8 балаға - 84 800 теңге, 9 балаға - 95 400 теңге, 10 бала - 106 000 теңге, ал 15 балаға – 159 000 теңге берілмек.

Ал елімізде 15 перзент бағып отырған жалғыз отбасы Солтүстік Қазақстан облысында тұрады екен. Айтып өту керек, жаңа жәрдемақы енгізілгелі аз қамтылған отбасылардың саны күрт азайыпты. Егер 2019 жылы шамамен 480 мың болса, биыл 73 мың ғана жанұя атаулы әлеуметтік көмек алып отыр.

Еңбек министрлігінің тағы бір жаңалығы – Отбасының әлеуметтік картасы. Ақпараттық жүйеге елдегі барлық халықтың мәліметі енгізіліпті. 7 миллион отбасыны бақылап отырудың жолын тапқан атқарушы билік көмекке мұқтаж отбасылар әлеуметтік карта арқылы мемлекеттік органдардың табалдырығын тоздырмайды деген сенімде.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!