Жол жүрудің шектелуіне байланысты Алматы-2 теміржол вокзалында да бірнеше күннен бері дүрбелең. Алыс-жақын ағайынға барамыз деп алдын ала билет алып қойған жолаушылар енді оның ақшасын қайтарып ала алмай жүр. Касса санаулы болғандықтан, кезектері жақындар емес.

Алматы вокзалын торуылдап жүрген жұрттың қарасы қалың. Айтуларынша, билеттерін өткізбегені былай тұрсын, экранға қайта- қайта қараумен «көзіміздің майы таусылып, мойнымыз талды» дейді. Сондай-ақ, мұнда жүзден аса адамның жиналуы «денсаулығымызға да қауіп төндіре ме?» деп қорқуда.

Шайзат Саябаева, Алматы қаласының тұрғыны:

- Кісі көп жерге бармаңдар дейді. Бүгін билет өткізуге келдік, міне, кісі қандай көп. Бәріміз жылжымай отырмыз. Менің нөмірім 353. Ал қазір таблода 125. Сонда қанша уақыт отыруым керек? Қанша коронавируспен, басқа да ауру тауып алуымыз мүмкін.  

Алайда жауаптылар халықаралық рейстің билетінің ақшасы кері қайтарылатынына уәде етуде. Бірақ ел арасына қатынайтын пойыздардың жол ақысының қайтарылу-қайтарылмауы белгісіз.

Алмас Айтбаев, Теміржол жолаушылар тасымалы маркетинг және сату департаментінің директоры:

- Бұл ретте компания мемлекетаралық қатынасты Қазақстаннан тыс бұрын рәсімделген билеттер бойынша жол жүру құнын толық көлемде қайтару туралы шешім қабылдады. Мемлекетаралық пойыздардың қысқартуына байланысты біздің кассаларға билет қайтару ерекше жоғары жүктеме түсті. Осы жағдайларды билет кассалары қосымша қолма-қол ақшамен қамтамасыз етілген.

Бұған қоса, бірнеше күннен бері ұшақ билеттерінің ақшасын қайтара алмай жүрген халық та бүгін наразылық білдіруде. 

Наталья Савченко, Алматы қаласының тұрғыны:

- Қайтарып береміз деп уәде беруден шаршамайды. Алайда сабылып жүргенімізге қанша күн өтті. Тағы да пайыздарын аламыз деп шықпаса болғаны. Егер ондай жағдайлар болса, бұл дегеніміз нағыз тонау ғой.

Әзірге тоқтаған әуе рейсі билетінің ақшасы нақты қашан қайтарылатыны  белгісіз. Өйткені төтенше жағдайға байланысты оларда ешқандай келушілерді қабылдамайды. Яғни жұмыс тек телефон арқылы және электронды форматта жүргізіледі.

Аюна Вальтер, Aviata.kz операциялық директоры:

- Барлық тоқтатылған рейс билеттерінің ақшасы толығымен қайтарылады. Біз авиакомпаниялардың талабына сай жұмыс істейміз. Яғни, олар алдымен рұқсат беру тиіс. Сосын біз ары қарай қаржысын қайтаруды жүзеге асырамыз.

Осылайша мамандар пойыз бен ұшақ билеттерінің ақшасын кері қайтарып береміз деп отыр. Тек даурықпай, сабыр сақтауға шақырады. Алайда бүгін-ертең жол жүруі тиіс болғандар кезекке үлгермей қаламыз ба деп қауіптенеді.  

Бізді Youtubе-та қараңыз! Бізді Facebook-та, Instagram-да, Telegram-да оқыңыз!