Қала тіршілігі тоқтағанымен, шақырайып тұрған күн сәулесінен қар асықпай еріп жатыр. Жаяу жүргіншіге де, көліктерге де еш қауіп жоқ. Ал елорда маңында тұратын тұрғындардың бірнеше күн мазасы кеткен. Олар коронавирус емес, аршылмаған қар суынан зардап көріп отыр. Бірнеше үй су астында қалды. Ал тұрғындар ағаш қойып амалдауда.  

Бас қаланың Байқоңыр ауданындағы көше тұрғындарының көктем сайын көретіні осы. Қыстай жиналып қалған қар суы, одан қалды түнделетіп жауған жаңбырдан үйлердің іші көлге айналған. Дүние-мүлік, тіпті нанның тілімі де су бетінде қалқып жүр.

Жанар Әбілдинова, Нұр-Сұлтан қаласының тұрғыны:

- Ешқандай көмек жоқ. тым құрыса осылай көрейік те. Толқын жасасақ, әрі қарай су кететін шығар. Судың тұрғанына біраз болды. Масқара! 21-ші ғасыр, не деген сұмдық мынау! Үкіметтен көмек жоқ.

Осы үйде 14 жылдан бері тұратын Айман Амангелдіқызының баспанасы да суға толы. Шелектеп сыртқа төккенімен, сағат сайын қайта жиналып жатыр. Неше күннен бергі ылғалдан пеші жанбай қалған. Саманнан салынған үйдің бір бұрышы төмен түсіп кетіпті.

Айман Амангелдіқызы, Нұр-Сұлтан қаласының тұрғыны:

- Келген он жылдың ішінде 100 «КамАЗ» топырақ төктім, сонда да судың ішінде қаламыз. Көмек жоқ ешқандай, әкімдікке хабарластық, қыстай қарын алдыра алмаймыз. Жолдасым мүгедек. Ешқандай ол кісіден көмек жоқ. Жедел жәрдем шақырсам, ол да келе алмайды. Құжат өткізіп тұрамыз, жылына бір рет кім тұрады, кім тұрмайтынын айтамыз. Әкімдіктегілер біледі.

Айманның «әкімдіктегілер біледі» деп тұрғаны, мұндағы үйлер заңсыз жер учаскесіне тұрғызылған. Аудан басшылығы сөйте тұра, жағдайларын ескеріп, жарық тартуға рұқсат беріпті. Тұтас бір көшенің кілкіген көлге айналуына әкімдік өкілі «заңсыз паналаған бұқара айыпты» дейді.

Дархан Сейітханов, Байқоңыр ауданы әкімдігінің бас инспекторы:

- Мынау үш бұрышта толығымен 45 үй орналасқан, 200 шақты адам өмір сүреді. Бірақ, үйлерді салу кезінде ешқандай құжаттары алынбаған. Сондықтан, үйлерді салу кезінде кісілермен биіктігі де аңғарылмаған. Рельефімен қараған кезде бұл үйлер төмен орналасып тұр. Төмен орналасқандықтан, судың барлығы осы жерден шығып жатыр.

Тұрғындар апта бойы келтіре алмаған төтенше жағдай қызметі мен әкімдіктегілер телеарнаның келетінін естіген соң, бар техникасымен алып-ұшып дереу жетті. Бастапқыда су тартатын моторды пайдаланды. Оның күші жетпеген соң, құтқарушылардың көлігімен суды сорды. Ал судан келген шығынды кімнің өтері белгісіз. Байқоңыр ауданында тағы 11 аймақтың суға кету қаупі бар.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!