Тараздағы 158/7 колониясының телефон байланысын бұғаттап тастайтыны бесенеден белгілі. Бірақ бұл жағдай түрмені жағалай қоныстанған жұрттың жүйкесін жұқартып бітті. Өйткені бұқараның әлеуметтік желіге қосылмақ түгілі, жай телефонмен хабарласуға мүмкіндігі жоқ.  

Қарлығаш Бекбергенова, Тараз қаласының тұрғыны:

- Бүкіл мына аймақтың сіздерге айтар өтініші: «Мына түрмені құртсын немесе бүгіннен бастап бұғаттамасын. Сабақ басталды.

Сәуірдің алтысынан елміздің барлық оқушылары қашықтан оқу жүйесіне көшеді. Алайда мұндағы шәкірттерге онлайн білім алу жығылғанға жұдырық болғалы тұр. Себебі, балалардың ғаламторға қосылуы мұң.    

Ақмарал Аманғараева, Тараз қаласының тұрғыны:

- Қазір балаларымыз онлайн оқуға шықты. Ешқандай байланыс жоқ. Сонда қалай оқиды?! Мұғалімдер кешеден бері шағымданып жатыр.

Тұрғындар ұялы байланысты шектейтін құрылғының кесірінен өркениет игілігінен қағылдық дейді. Ал байланыс операторлары сигналдың әлсіз болуына түзеу мекемесі кінәлі деген. Бірақ колония басшылығы құрылғының бүкіл маңайды басып қалуы мүмкін емес дейді.   

Алмазбек Әзірбеков, ЖД-158\7 түзеу мекемесінің бастығы:

- Бүгінгі таңда тиісті шара қолға алынды. Мамандар байланыс жүйесін бұғаттайтын құрылғының таралу аумағын қалыпқа келтіріп жатыр. Жақын арада шешімі шығуы керек.

Ал шенділер Бұрыл елді мекеніндегі оқушылардың жаппай интернетке қосылмады деуі – бекер дейді. Сөздеріне сенсек, осы ауданға қарасты 136 оқушының тең жарымында қиындық болған. Бірақ оның өзі уақытша деп сендіреді.

Уәлихан Байдуанов, Тараз қалалық білім бөлімі басшысының міндетін атқарушы:

- Кеше 136 баланың кейбірі қосылмағаны анықталған болатын. Бұл жөнінде түзеу мекемесінің басшылығымен заңға сәйкес тиісті орындар тарапынан жұмыстар жүргізіліп жатыр.

Түзеу мекемесі мен білім бөлімі ортақ мәмілеге келе ме? Қазір қос тарап өгіз өлмей, арба сынбайтындай шешім қарастырып жатыр. Өйткені түрмеден байланыс шектеуін өшіре салу да оңай шаруа емес. Себебі, бұл сәтті жазасын өтеушілер ұтымды қолданып кетуі ықтимал.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!