Сенатта сенбіден бері қарбалас. Мемлекеттегі екінші орынтақ босаған соң, біраз ауыс-түйістің басы қылтиған. Бүгін де таңнан бері Жоғарғы палата ғимаратының алды бір тыншымай, сүлік қара көліктер арлы-берлі сабылумен болды. Тек жаңа спикердің президент әкімшілігінен келетінін ешқандай ұзынқұлақ ертерек тап басып айта алмады. Ал жаңа төрағаның кандидатурасын ұсынуға Сенатқа президент келді.

Қасым-Жомарт Тоқаев, Қазақстан Республикасының президенті: 

- Менің жарлығыммен Сенат депутаты Дариға Нұрсұлтанқызы Назарбаеваның өкілеттігі тоқтатылды. Ол Сенат төрағасы ретінде бір жылдан астам белсенді, әрі жемісті жұмыс істеді. Парламент Сенаты төрағасының лауазымына Мәулен Сағатханұлы Әшімбаевтың кандидатурасын ұсынамын. Ол мемлекет қызметінің қыр-сырын жетік меңгерген, ұзақ жыл түрлі салада жемісті және тиімді жұмыс атқарды. Парламент жұмысын жақсы біледі.

Ереже бойынша бет-аузын тұмшалаған Жоғарғы палата депутаттары жасырын дауыс берді. Былтыр ғана Дариға Назарбаеваны бірауыздан қолдап спикер еткен сенаторлар, бүгін біреуі қалыс қалмай Әшімбаевқа дауыс берді.

- Құрметті депутаттар! ҚР Парламенті Сенатының төрағасы лауазымына Мәулен Сағатханұлы Әшімбаев сайланды. Құттықтаймын!  

Әшімбаевтің Парламентке барып тұрғаны бірінші рет емес. Ол 2012-2018 жылдары қатарынан екі маусым Мәжіліс депутаты болғанын білеміз.

Мәулен Әшімбаев, Сенат төрағасы:

- Президентіміздің стратегиясын, саясатын жүзеге асыру бұл барлық мемлекеттік органдардың, барлық билік тармақтарының алдында тұрған ең негізгі мақсат. Осы президентіміздің саясатын заңнамалық тұрғыдан қамтамасыз етуге мен бар күш-жігерімді, саламын деп бүгін сіздердің алдарыңызда уәде беремін.

Ал Әшімбаевтың бұрынғы орны - Президент әкімшілігі басшысының бірінші орынбасары қызметіне Ақпарат және қоғамдық даму министрлігін басқарып келген Дәурен Абаев келді. 41 жастағы Дәурен Әскербекұлына Ақорданың ішінде қызмет ету таңсық емес. 2011-2016 жылдар аралығында тұңғыш президент Нұрсұлтан Назарбаевтың баспасөз хатшысы, әрі кеңесшісі болған. Осы алпауыттардың қатарына бүгін Аида Балаева да қосылды.  

Балаеваның бұған дейін атқарған қызметтерін қарасақ, Астана қаласы әкімінің орынбасары. Онан соң Президент Әкімшілігінде бөлім меңгерушісі болып келген ол енді ғана үлкен сахнаға шығып, білдей саланы бірінші рет қолына алып отыр. Ол бүгіннен бастап Ақпарат және қоғамдық даму министрі.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!