Үстеме ақы: Маңғыстау облысындағы дәрігерлердің талабы орындалмайды
Маңғыстау облысында дәрігерлер үстеме ақы талап етті. Облыстық аурухананың қабылдау бөлімінде істейтін қызметкерлер күн сайын түрлі жұқпалы ауруы бар науқастармен кездесетіндіктен, «дерт жұқтыру қаупі – жоғары» дейді.
Автор: Айзат Тұрғынбекқызы
07.05.2020
- Дәрігерлерге үстеме ақы берілмегендігін айтқымыз келеді. Берілуін талап етеміз! Талап етеміз! Талап етеміз!
Осылайша олар өз талап-тілектерін бейнетаспаға жазып, ғаламторда таратқан. Медицина қызметкерлері қазір қауіпті вирус жайлаған кезде алғы шепте жүрген әріптестері сияқты, оларға да жұқпалы дерт жабысу қаупі жоғары екенін айтқан. Облыстағы орталық аурухана болғандықтан, мұнда өңірдегі барлық ауданнан әртүрлі ауруы бар адамдар жеткізіледі. Қызуы көтерілген, аурудың түрлі белгілері бар науқастарды қауіпті екенін білсе де, қабылдауға міндетті. Бірақ Облыстық денсаулық сақтау басқармасы дәрігерлердің бұл уәжімен келіспейді. Олардың айтуынша, коронавирусқа күдіктілер бірден арнайы стационарға жіберіледі екен. Сондықтан олардың бұл талабын орындау мүмкін емес.
Нұрбол Оқуов, Маңғыстау облыстық ДСБ баспасөз хатшысы:
- Үстеме ақы беру жөнінде айтатын болсақ, бұл комиссиямен шешіледі. Олар тікелей байланыста болмаған. Үстеме ақы осы эпидемиологиялық шараларға тікелей қатысып жатқан және COVID-19 індетін жұқтырған науқастармен тікелей байланыста жұмыс істеп жатқан медицина қызметкерлеріне ғана тиесілі.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
