Жамбылда карантинге алынған медицина мамандары шу шығарды
Жамбылда тағы да дәрігерлер дүрлігіп жатыр. Бұл жолы карантинге алынған медицина мамандары шу шығарды. Олардың айтуынша, провизорлық стационарда санитарлық талап мүлдем сақталмаған. Сондықтан басшылығынан мәселеге араласып, жағдайды реттеп беруін талап етеді.
Автор: Руслан Әбдіхалық
07.05.2020
- Іші сұмдық! Төсеніштерді де ауыстырған жоқ. Әжетханасы қоқысқа толып тұр. Санитарлық өңдеу жасалмаған болып тұр ғой сонда. Бізді қалай бұл жерге әкеліп жатқызады?!
Облыстық жұқпалы аурулар мен балалар ауруханасының қызметкерлері. Жалпы саны – 26 адам. Вирус жұқтырған әріптестерімен байланыста болғаны үшін оқшуланған. Алдымен бәрі Тараздағы қонақ үйге жатқызылып, кейін Байзақ ауданындағы провизорлық стационарға жеткізілген. Ал мұндағы көрініс олардың ашуын туғызыпты. Санитарлық талаптың сақталмауынан, өзіне індет жұқтырамыз ба деп қорқады. Ал Денсаулық сақтау басқармасы видеодағы тек бір бөлмедегі ахуал деп ақталды. Олардың сөзінше, мамандар дайын емес бөлмеге асығыс кіріп кеткен. «Қазір жағдай реттелген», - дейді. Басқарма басшылығы қызметкерлерінің талабы жұлдыздардың райдерінен кем болмағанын айтады. Яғни, теледидар, вай-фай сынды өрениет игілігін қосып беруін сұраған. «Ал бізде ондай мүмкіндік жоқ», - дейді шенеунік.
Хамит Мырзақасымов, Жамбыл облыстық ДСБ басшысының орынбасары:
- Түсіндіру жүргізілді. Нәтижесінде барлық бөлмелердегі дезинфекциялық тазарту жұмыстары қайта жүргізіліп, төсек орындары жаңасына ауыстырылып және жеке гигеналық құралдармен қамтамасыз етіліп, барлығы орналастырылды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
