Аймақта коронавирус жұқтырған 240 адамның 173-і – мұнайшылар. Бұған дейін мұндағы 160 адамнан коронавирус табылып оқшауланған. Бүгін олардың қатары тағы көбейді. 17 мыңнан аса жұмысшысы бар Теңіз кен орнында індеттің таралуына қарапайым ережелердің сақталмауы себеп. Пандемияның таралуына байланысты қызметкерлерін жаппай  үйіне жіберу туралы шешім қабылдаған. Өңірде індеттің таралуына байланысты вахталық қалашық жабылып, қозғалыс шектелді. Кешкі 21:00-ден таңғы 5-ке дейін еркін жұрып-тұруға тыйым салынған.

Ержан Төлек, Атырау облысы әкімінің баспасөз хатшысы:

- «Теңізден» 5 мамырға дейін 17 мың адамды шығару жоспарланған болатын. Солардың қазіргі күнге дейін 15 мың адам шығарылып үлгерді. 2 мың адамды шығару әлі де жалғасып жатыр. Жалпы «Теңіздегі» эпидемиологиялық ахуал күрделі. Себебі, ондағы азаматтар ондағы талапты дұрыс сақтай бермейді. Қазір 173 адаммен байланыста болған 1700 адам стационарда жатыр.

Бүгін елімізде індет жұқтырғандар саны 4 жарым мыңнан асып тұр. Өңірлерге жеке-жеке тоқталатын болсақ, сүреңсіз статистканың көш басында Алматы тұр. Оңтүстік астанамызда 1400-ден аса жағдай тіркелсе, 227 адам қауіпті кеселден айыққан.

Бүгін бас қалада індет жұқтырған 25 адам анықталды. Оның ішінде бір отбасының мүшелері бар. Екі баласы бар ерлі-зайыптылар мен қарт кісілер дәрігерлердің бақылауында.

Қостанай облысында Ресейден Федерациясынан келген 18 жастағы студенттен инфекция табылды. Көршілес елден шекара асқан тағы 16 адам стационарға жатқызылды. Республика бойынша эпидемияға қарсы дезинфекциялық шаралар әлі де жасалып жатыр. Карантиндік шектеулер жеңілдетілгенімен толықтай жойылған жоқ. Сондықтан еліміздің бас санитар дәрігері санитарлық талаптарды қатаң сақтауды сұрайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!