Ел билігі тағы бір мәрте бұқараның жоғын түгендеуге көшті. Бүгін президент мәлімдемесінде әлеуметтік мәселелердің біразы: қолжетімді баспана, жұмыссыздықпен күрес және салық салу механизмін өзгерту қаралған. Енді пәтер жалдап, туысын сығалап жүргендердің баспана базынасы шешіледі.

Сол үшін «5-10-20» несиелік бағдарламасы қолға алынбақ. Яғни, 10 пайыз жарнаңыз болса, 5 пайызбен 20 жылға дейін үй алуға болады. Бұған Ұлттық банк 210 миллиард теңге бөліп отыр.

Қасым-Жомарт Тоқаев, Қазақстан Республикасының президенті:

- «7-20-25» тұрғын үй бағдарламасы тиімділігін көрсетті. Сол сияқты тұрғын үй кезегінде тұрғандарға «5-20-25» бағдарламасын іске қосамыз. Биыл жалпы 15 миллион шаршы метр немесе 150 мың пәтер мен тұрғын үй салу жоспарда бар. Бұл мақсатқа біз дағдарысқа қарсы іс-шаралар аясында 390 млрд теңге жұмсаймыз.

Баспанаға қатысты жаңалық мұнымен біткен жоқ. Зейнетақы қорындағы жинақты пайдалану мәселесін Үкімет сағызша созып жүр. Президент 1- шілдеге дейін осыны нақтылауға пәрмен берді. Сонымен бірге үйсіз-күйсіз жүргендердің проблемасымен айналысатын бөлек институт құрылмақ. Ол «Отбасы банкі» деп аталады.

Қасым-Жомарт Тоқаев, Қазақстан Республикасының президенті: 

- Мен алдында осындай тапсырма бергенмін. Бірақ төтенше жағдай режиміне байланысты созылып кетті. Шешім қабылдайтын уақыт келді. Үкімет 1-шілдеге дейін осыны нақтылауы қажет. Үкімет жыл соңына дейін «Тұрғын үй жинақ банкі» негізінде тұрғын үйді бөлу, есеп жүргізу реттейтін «Отбасы банкі» атты азаматтарды қолдау мен дамыту институтын құруы керек.

Айлығы шайлығына жетпегендерге мемлекет төтенше жағдай режимі кезінде 42500 теңгемен риза қылды. Бес миллиондай азамат әлеуметтік көмекті алған. Еңбек министрі төтенше жағдай аяқталды, 42500 теңгені беру де тоқтады дейді.

Біржан Нұрымбетов, ҚР Еңбек және халықты әлеуметтік қорғау министрі:

- 11 мамыр, төтенше жағдайдың мерзімі аяқталды. Сондықтан біз бүгіннен бастап 42500 теңге алуға беріліп жатқан жаңа өтініштердің қабылдануын тоқтатамыз. Бірақ 11 мамырға дейін өткізілген өтініштердің барлығы міндетті түрде қаралып, ережеге сәйкес болса, төленетін болады.

Жыр болған әлеуметтік төлемді алғандардың 40 пайызы – 2651 теңгені алғаш рет төлегендер екен. Көмекке мұқтаж жандарды «көлеңкеде» қалдырмаймыз деген Тоқаев, оларды жұмысқа тартпақшы. Алайда әлемдік дағдарыстың кесірінен кәсіпорындар жұмысы тұралап, жұмыс орындары қысқарып жатқанын Президенттің өзі ескертті. 

Қасым-Жомарт Тоқаев, Қазақстан Республикасының президенті:

- Өкінішке қарай, әлемде кәсіпорындар жабылып, жұмыс орындарын сақтап қалу, әр бизнестің тұрақтылығын қамтамасыз ету мүмкін болмай тұр. Сондықтан экономика секторы үшін төтенше жағдай режимін заңнамалық түрде форс-мажорлық жағдай деп мойындауды ұсынамын.

Әлеуметтік бағытқа енгізілген тағы бір өзгеріс табыс салығына қатысты. Қазір қазақстандықтар өз жалақыларының 10 пайызын жеке табыс салығы ретінде төлеуде. Бұдан былай, сома – тапқан пайдаға байланысты болмақ. Неғұрлым табысыңыз көп болса, соғұрлым көп мөлшерде мемлекеттік бюджетке салық төлейсіз.

Ал ел бойынша бүгін Төтенше жағдай режимі алынғанымен, карантин жалғаса бермек. Өйткені індеттің беті толық қайтқан жоқ. Сондықтан карантиндік шектеулер де сол эпидемиологиялық ахуалға байланысты әр өңірде кезек кезеңімен алынатын болады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!