Жұрт той тойлап, садақа жиынға еркін барғанды қалайды. Еліміздің бас санитар дәрігерін күн сайын осы сұрақпен мазалайтындар көп екен. Айжан Есмағамбетова оразада ауызашарға шақырушыларға тоқтам болмай тұрғанын айтады. «Көпшілік жиналған соң, бұл да індеттің таралуына кесірін тигізеді», - дейді ол.

Айжан Есмағамбетова, ҚР Бас санитар дәрігері:

- Ауызашарға қонақ шақыруға болмайды. Жақында вирустың таралуына қатысты жағдайды тексергенде, осы ауызашарға келгендер арасында індет табылды. Елде төтенше жағдай тоқтатылғанымен, карантин алынған жоқ. Кейбір аймақтарда әлі жағдай тұрақтамады. Маңғыстау, Атырау, Шығыс Қазақстан облысытарында індеттің таралуы жеті пайыздан асып кетіп отыр.

Ауру дендеп тұрған үш аймақтың бірі – Атырау облысында кеше 21 адамнан, бүгін 17 адамнан Covid-19 табылды. Мұндағы індет жұқтырғандар бұрынғысынша Теңіз кешіндегі жұмысшылар. Карантин шараларын барынша күшейткен. «Бірақ вирустың таралуын тоқтатуға әлі екі аптадай уақыт кетеді», - дейді мамандар.

Алмагүл Көшкімбаева, Атырау облыстық тауарлармен көрсетілетін қызметтердің сапасын бақылау департаментінің бас маманы: 

- Соңғы тәулікте ол жерде 40-тан аса ауру жұқтыру фактісі анықталған. Олар бұрын ауруды жұқтырғандармен байланыста болған және демобилизация алдында тестілеуден өткендер. Бүгінгі күні Теңіз кен орнында карантиндік стационарда 1800 жақын және ықтимал қарым-қатынаста болған адамдар жатыр. 

Соңғы деректерге қарағанда ел бойынша коронавирус жұқтырғандар саны 5300-ге жақындап қалды. Олардың 2100-ден астамы ауруынан айығып, үйіне қайтыпты. 32 адам қайтыс болды. Бұл сүреңсіз кестенің басында тұрған – Алматыда вирус жұқтырғандар көп тіркелгенімен, мамандар қала ішінде індеттің жайылуы тоқтады деп отыр.

Елорда мен Алматыда бірнеше апта бойы жаңа ауру ошағы табылмады. Бұрынғыдай қаптатып карантинге жабылып жатқан үйлер жоқ. Десе де коронавирус ауруханалар мен провизорлық орталықтарға оқшауланғандардан анықталып отыр. Олар науқаспен байланыста болғандар екен.

Жамбыл облысында да осындай жағдай. Соңғы бір тәулікте вирус табылған 10 адамның жетеуі бір-біріне туыс. Олар індетке шалдыққан Қордайдың тұрғынымен бұрын байланыста болғаны үшін карантинге жатқызылған.  

Ғазиз Надуев, Жамбыл облысының бас санитар дәрігері:   

- Ол кісілер бүгінгі таңда ауру болып есептеледі. Не дегенмен ол кісілерге вирустың оң нәтижесі берілді. Енді олар карантиндік госпитальдан инфекциялық стационарға жатқызылып, толық ем-дом алады.

Еліміздің бас санитар дәрігері індеттің беті қашан қайтатынын және карантин қашан бітетінін айта алмайды. Бірақ үш өңірден басқа, қалған 14 аймақтағы аурудың таралуы тоқтағанына шүкіршілік етіп отыр. «Бұрын вирус жұқтырғандар екінші қайтара ауруы мүмкін бе?» деген сұраққа да нақты жауап жоқ әзір. Себебі, ондай жағдай осы күнге дейін тіркелмепті.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!