Ақтауда аң-құстары аш қалған ресейлік цирк көмек сұрайды
Короновирустың кесірі хайуандарға да тиіп жатыр. Ақтауға гастрольмен төрт ай бұрын Ресейден келген цирк карантинде қаңтарылып қалған. Соның салдарынан табыстан қағылған цирк ұжымы аң-құсты аш қалдырмау үшін Ақтаудың қалталы азаматтарынан көмек сұрауға мәжбүр.
Автор: Саят Дәулетжанұлы
14.05.2020
Ақтауда жіпсіз байланған аңдар күніне 20 келіден астам ет жейді екен. Ал мұның орташа бағасы 40 мың теңге. Аңдардың тамағына ары кетсе, бір аптаға жететін қаражат қалыпты. «Қарапайым жұртқа алақан жаюға арымыз жібермейді, онсыз да қиын жағдайда отырған елді мазалау – орынсыз», - дейді цирктегілер. Сондықтан олар қаражаттан тарыла қоймаған ірі бизнес өкілдерінен көмек сұрайды. Ал карантиннен кейін жалпақ жұртқа тегін қойылымдар жасап, қарызды өтейтінін айтады.
Мария Юсупова, цирк әртісі:
- Біз аз қамтылған отбасы балаларына , балалар және қарттар үйінде тегін қойылымдар өткізуге әзірміз. Осындай шараларды ұйымдастырушылар табылып, қаржылай қолдаса, өтеуін осылай жасаймыз. Шет мемлекетте қалғандықтан, бізге керегі тек жұмыс. Дәл қазіргі жағдайда аңдарымызды аш қалдырмауға қаражат табуымыз қажет.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
