Алматы кептеліске толы өміріне қайта оралғандай. Қалада көліктер қаптады. Блок-бекеттерден өтуге арнайы рұқсат алған адамдар бер жақтан ар жаққа, арғы беттен бергі бетке ағылып жатыр.

Әсіресе облыстан өтіп жатқандардың қарасы көп. Өйткені көбінің қызметі қалада. Екі айдан бері үйге қамалғандар жайшылықта кежегесі кері тартатын жұмысқа ерекше желпініспен бара жатқандай. Ал рұқсаты жоқтар арғы беттегі туыс, дос-жаранға сәлемдеме жіберуге жеткен.

Рамазан Жаппаров, Алматы қаласының тұрғыны:

- Карантин... білеймін ешқандай әсері жоқ.

- Үйде жаттыңыз ба?

- Үйде бала-шағаммен жаттық, ешқайда шыққан жоқпыз. Подьезге де шыққан жоқпыз тіпті.

- Сізге жаққан сияқты ғой, соған қарағанда?

- Иә.

Қалада қамалып, облысқа енді бет алған көліктер қаз-қатар тізілген. Кептелестің ортасында әнші Арман Қоңырбаев да жүр. Осыған дейін лаунж барлардың бірінде отырғаны әшкере болған әнші карантин режимін бұзғаны үшін айыппұл арқалаған еді.

Арман Қоңырбаев, әнші:

- Ол жерде ешқандай ішімдік ішіп, қуып, билеп жүрген жоқпын. Ол жерде кездесуім бар еді.

- Бүгін бірінші рет шығып бара жатырсыз ба?

- Жоқ, бірінші рет емес. Менде рұқсат бар, жұмыс бабымен.

Карантинде той-томалақтан табыс тоқтаған соң, Арман облыстан қатынап нәпақа табуға көшкендей. Бірақ қандай қызметпен айналысатыны өзіне мәлім.

Алматыдан облысқа, облыстан қалаға кіруге қатынап жұмыс істейтіндерге рұқсат берілді. Қалғандары шектеудің алынғанын күтуіне тура келеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!