Көлігімен блок-бекетті бұзып өтіп, патрульдік машинаға соғылған мас жүргізушінің полицей екені кеше әлеуметтік желілерде айтылған. Алайда Ішкі істер министрлігі мен қалалық полиция департаментіндегілер мұны теріске шығарған болатын. Тек бүгін өз сөзіне өздері қарсы шығып, оның бұрын тәртіп сақшысы болғанын әрең дегенде растады.

- Жантүршігерлік апатты жасаған жүргізуші бұрын погон киген. Алты жыл полицияда жұмыс істеген. Ол қызметтік міндетін тиісінше орындамағаны үшін 4 рет тәртіптік жаза алды. Бұл оның ішкі істер органдарынан кетуіне себеп болды.

Салтанат Әзірбек, Алматы қалалық ПД ресми өкілі:

- Бірақ полиция департаментіндегілер жұмыстан нақты қашан шығарылғанын айтпады. Сондай-ақ, блок-бекетті жан-жақтан камералар түсіріп тұрғанымен, апаттың жазбасы сол күйі жарияланған жоқ. Есесіне, әлеуметтік желіде «Сергектен» түсірілген сурет толып тұр. Сондай-ақ, жүйткіп келген көлік жүргізушісінің жантүршігерлік оқиғадан кейін түсірілген суреті де тараған болатын. Онда 26 жастағы жігіт киімсіз жатыр. Мұның бәрі көптің көңіліне күдік ұялатқаны сөзсіз.

Күдікті Шаңырақ ықшамауданындағы коттеджде тұрған. Ол әлі отбасын құрмапты. Яғни мұнда ата-анасымен бірге тұрған. Іште адам болғанымен, есіктің қоңырауын басқанымызда, ешкім жауап бермей қойды.

26 жастағы жігіттің блок-бекеттің ойранын шығарғанын естіп, жақын араласатын көршілері аң-таң. Олар Азат Азаматовтың бұрын-соңды артық әрекетін байқамағанын айтады. Күдіктінің әкесі құқық қорғау органында жұмыс істеп, ұлы соның ізімен осы салаға келген екен. Әрі жігіттің кешегі күнге дейін форма киіп, қызметте жүргенін көршілері растап отыр.

Нартай Маханов, күдіктінің көршісі:

- Азат, иә, полицияда істейді, формасы бар. 

- Кешеге дейін жұмыс істеп келді ғой сонда, иә? 

- Енді, кешеге дейін көремін, полицейдің формасымен, бәрі бар, машинасы бар астында, полицейлік.

Марқұм Дастан Әбдіқановтың жары да күдіктіні танитын болып шықты. Айтуынша, ол күйеуімен қызметтес болған.

Динара Әбдіқанова, марқұмның жесірі:

- Кінәлі жүргізуші полицияда қазір жұмыс істемейді деген ақпарат – жалған. Ол менің күйеуіммен түнгі ауысымға шығып жүрді. Оларға өзім түнде тамақ әзірлейтінмін. Мен күйеуімнің әріптестерін жақсы танимын.

Қара жамылғандар өзі тәртіп сақшысы бола тұра, мас күйінде жантүршігерлік апат жасаған жүргізушіні әділ жазалауды сұрайды. Бүгін оның кесірінен қаза тапқан Дастан Әбдіқанов пен Жарас Жанғазиев жер қойнына тапсырылды. Ал зардап шеккен үшінші полицейдің жағдайы әлі де ауыр дейді дәрігерлер.

Кеше таңғы сағат бес жарымда жүйткіген BMW блок-бекетті бұзып өтіп, патрульдік машинаға соғылған еді. Көліктегі аға лейтенант сол жерде тіл тартпай кетсе, 26 жастағы сержант ауруханада қаза тапты. Қазір жантүршігерлік жағдайға қатысты сотқа дейінгі тергеу амалдары жүріп жатыр. Ал, әріптестерінің өліміне себеп болған күдіктінің өмір бойына бас бостандығынан айырылуы мүмкін.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!