Covid-19: Теңіз кеніші мен ШҚО-да карантин ұзартылды
Елде коронавирус жұқтырғандардың саны азаймай тұр. Соңғы бір тәулікте тағы 356 адамның індет жұқтырғаны анықталған. Көбі Алматыда. Covid-19 вирусы ушығып тұрған Атырау облысының Теңіз кенішіндегі карантиндік жағдай тағы екі аптаға ұзартылды. Шығыс Қазақстанда да карантин маусымның 13-не дейін созылмақ.
Автор: Бекен Әлирахым
29.05.2020
Маңғыстау облысында бір күнде коронавирус жұқтырған 40 адам тіркелді. Ауру ошағы ауылдық жерлерден көптеп шыға бастаған.
Сәкен Мелдебаев, Маңғыстау облыстық Тауарлар мен көрсетілетін қызметтердің сапасын бақылау департаментінің өкілі:
- Облыстың бас санитар дәрігері Қарақия ауданы Жетібай ауылдық округіне карантин жариялау туралы қаулы қабылдады. Ал Мұнайшы ауылына блок-бекет орнатылып карантинге жабылды. Дерт жұқтырғандардың дені науқастармен тығыз байланысты болғандар.
Батыс Қазақстан облысындағы эпидемиологиялық ахуал да ушығып тұр. Мұнда 51 науқас тіркелген. Ауру таралмауы үшін Тасқала селосы карантинге жабылды. Ал Атырау облысында пандемия басталғалы ауру жұқтырғандар саны мыңға таяп қалды. Негізгі ауру ошағы Теңіз кенішінде болғандықтан, ондағы карантин тағы 14 күнге ұзартылды.
Алмагүл Көшкінбаева, Атырау облыстық Тауарлар мен көрсетілетін қызметтердің сапасын бақылау департаментінің бас маманы:
- Теңіз кенішінде бүгінгі күнгі сағат түнгі 12:00 ден бастап 12-маусымға дейін карантиндік режим ұзартыды. Осыған байланысты Теңіз кенішіне кіріп-шығу шектетілді. Тек аса қажетті мамандар мен азық-түлік, медициналық препараттармен қамтамасыз ететін ұйымдардың өкілдері ғана өткізіледі.
Ең үлкен өсім бүгін Шығыс Қазақстан облысында байқалды. Осыған байланысты аймақтың бас санитар дәрігері мұнда да карантиннің 13 маусымға дейін ұзартылатындығын мәлім етті. Дегенмен ертеңнен бастап шағын және орта бизнесі саласына қатысты бірқатар нысандар ашылмақ.
Даниал Ахметов, Шығыс Қазақстан облысының әкімі:
- Шағын мейрамханалар, гүл сататын орындар, шаштараз және сұлулық салондарының жұмыс істеуіне рұқсат береміз. Бірақ карантиндік талап қатаң сақталуы тиіс. Сонымен бірге ертеңнен бастап аумағы 500 шаршы метрге дейінгі сауда орталықтары мен ашық аспан астындағы базарлар да іске қосылады.
Соңғы дерек бойынша елімізде 9932 адам коронавирус жұқтырып үлгерді. Ал COVID-19 дан жазылғандардың саны 4900-ға жеттті. Өкінішке қарай, қатерлі дерт 37 адамның өмірін жалмады. Дегенмен жағымды жаңалық та жоқ емес – бүгін төрт облыста (Ақтөбе, Қостанай, СҚО және Түркістан) ауру белгілері тіркелген жоқ.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
