Блок-бекеттердің қашан ашылатыны жұрт сарыла күткен жаңалық екені сөзсіз. Елде маусым айынан бастап теміржолда жолаушылар тасымалы басталатынын өткенде жариялаған Үкімет бүгін көлік қатынасының да жанданатынын жариялады. Бірақ әңгіме бүкіл бағытта емес, тек өңіраралық қатынас туралы болып отыр. Оның ішінде жеке көліктерге 1-маусымнан  бастап рұқсат берілсе, автобустар 5-інен бастап қатынайды.

Жәнібек Тайжанов, Көлік комитеті төрағасының орынбасары:

- Үкіметтік комиссияның шешіміне байланысты қалааралық автобус қатынасы қайта жалғасады. Тасымалдаушылардың жұмыс тәртібі Бас мемлекеттік санитар дәрігердің талаптарын сақтай отырып бекітілді. Автобустар соңғы бекеттерде дезинфекцияланып, жолаушылар тек бетпердемен кіреді.

Өңіраралық көлік қатынасы ашылғанымен, облыстың ішінде блок-бекеттер сақталуы мүмкін. Өйткені облыс немесе қала аумағында коронавирус бой бермей жатса, Бас мемлекеттік санитар дәрігер немесе өңірлік әкімдіктер блок-бекет орнату туралы шешім қабылдай алады. Сондай-ақ, жергілікті әкімдіктер жолаушылар қатынасына қатысты барлық талаптың сақталуын қамтамасыз етуі керек.

Сәдуақас Байғабылов, Көліктегі бас санитар дәрігер:

- Бұл бұрынғы қалпымызға қайта келеміз деген сөз емес. Санитарлық талаптар сол күйі қалады. Яғни, әлеуметтік арақашықтық, медициналық берперде кию, бекеттерде, автобустар мен вагондарда санитайзерлердің болуы керек. Ал теміржол немесе автокөлікпен қатынаушылар барған жерінде карантинге жатқызылмайды.

Ал теміржол қатынасының жандануы 3 кезеңнен тұрады. 1-маусымнан  бастап пойыздар 54 бағытта – теміржолдағы бүкіл жолаушылар тасымалының жартысы жүре бастайды. 10-маусымда 39 бағыт іске қосылса, одан соң жағдайдың оңалуына қарай тағы 15 бағытта пойыз жүргізу көзделген.

Бірқатар елдерде санитарлық-эпидемиологиялық жағдайдың тұрақталуын ескеріліп, халықаралық әуе бағыттарын кезең-кезеңмен іске қосу қарастырылып отыр. Әуелде Оңтүстік Корея, Қытай және Әзербайжан бағыттары ашылса, кейін Біріккен Араб Әмірлігі мен Германия, Түркия, Таиланд бағыттарына да әуе қатынасы жанданады. Бірақ қашан ұшырылатыны жағдайдың тұрақталуына қарай нақтыланады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!