- Түрменің ішіндегілер терезеден сыртқа орамал бұлғап, көмектесіңдер, жедел жәрдем шақырыңдар деп жатыр...

Тергеу абақтысының ішінде соңғы екі тәулікте болып жатқан жағдай қамаудағылардың туыстарына фото, видеолар арқылы жеткен. Жақындарының жағдайына алаңдаған жұрт іштегілердің «не күйде екенін мүлде біле алмай отырмыз» дейді.   

Нұргүл Бекмағамбетова, Атырау қаласының тұрғыны:

- Күйеуімнің басы ісіп кеткен, арқасын, бетімен соғып тастаған, сұмдық қылып. Бүгін кісілерге хабарласып тұрамыз ғой, барасыңдар ма деп соғайын десем, мында көтеріліс болып жатыр дейді. Жетіп келдім, мына жақта 3 қабатта айғайлап жатыр, «көмектесіңдер, көмектесіңдер бізге» деп. Ақ футболкамен қызыл қанды былай шығарып, «көмектессін» деп айтып жатыр.

Ерболат Қуатәлиев, Атырау қаласының тұрғыны:

- Жағдайы жоқ, қайда бәрі?! Бір сотталғанға 900 мың теңге ақша бөлінеді жылына. Күніне 2 АЕК кетеді, бір сотталғанға, қайда ол?! Мен бостандықта 5 мың теңгеге күніне манты, қуырдақ жеймін.        

Түрменің ішінде түсірілген бейнекөрініс:

- Міне, міне, қансырап жатыр, жүре алмай жатыр, жедел жәрдем жоқ, дым жоқ... 

Абақты ауласында бақыртып музыка қойылған. Әйтсе де, іштен әлсін-әлсін жедел жәрдем шақырып, айқайлаған дауыс бәрібір естілуде. Ал құзырлы орган өкілдері: «Ешқандай жүгенсіздік, зорлық-зомбылыққа жол берілген жоқ» дейді. «Терезеден қол бұлғағандардың киімдері қызыл бояумен боялған» деп отыр.

Мұрат Құрмашев, Атырау облыстық ҚАЖД бастығының міндетін атқарушы: 

- Жоқ, ұрып-соққан ештеңесі жоқ. Қазір облыстық прокуратура қызметкерлері таңертеңнен бастап осында. Қазір бәрін МПМ Ұлттық тетіктің қызметкерлері аралап тексеріп жүр.    

Алайда мынадай оқиғадан кейін «таяққа жығылдық» дегендердің түрін көрсетпейінше, түрменің алдын торуылдаған туыстары кетпейтінін жеткізді.    

Тергеу изоляторында 238 адам жатыр екен. Олардың бесеуі жаппай тәртіп бұзғаны үшін жауапқа тартылыпты. Ал оларды тергеу изоляторының алдына келіп тұрған туыстарымен кездестіре ме, кездестірмей ме, ол жағы әлі белгісіз. Жалпы бұл жағдай облыс прокурорының жіті қадағалауында болады дейді мамандар. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!