Карантин кезінде жағдай жасалмағанын да жайып салды. Ал құзырлы орындар мәселені «қайта қараймыз» деп уәде берген. Жедел жәрдемдегілердің жанайқайын тілшіміз тыңдап келді.

Мекеме алдына жиналған 50-ден аса қызметкердің өкпесі қара қазандай. Өйткені екінші санатты жедел жәрдем қызметкерлері мен дәрігерлерге карантин кезінде ай сайын 425 мың теңгеден беріледі деп уәде етіліпті. Алайда ақ халаттылар «алғашқы айын бөліп-бөліп берген басшылық, соңғы айды мүлдем жарытпады» деп ашынуда.

Төтенше жағдай кезінде қосалқы станция қызметкерлері де күшейтілген режимде жұмыс істеуге көшкен. Тіпті демалыссыз қызмет атқарған кездері де кездесіпті. Алайда «еңбегіміз ақталмады» деген олар тиесілі ақшасын талап етуде.

Дилшат Юсупов, жедел жәрдем дәрігері:

- Бізде 20 бригада бар. Шақыртуды таңдай алмаймыз. Қайда шақырса, сонда барамыз кезек бойынша. Ол жақта не болады, біз білмейміз, коронавирус пе, коронавирус емес пе...

Осылайша ақ халаттылар ақша ала алмағанын былай қойып, карантин кезінде жағдайы жасалмағанын да жайып салды. Айтуларынша, басшылық қауіпті орында жұмыс істейтін оларды қорғаныш заттарымен толық қамтамасыз етпеген.

Бағлан Молдақынова, жедел жәрдем қызметкері:

- Карантин кезінде формалар берілді, бірақ жеткіліксіз. Форманың өзін 5-6 шақыртуға киеміз. Ал негізі олай киюге болмайды.Ол дымқыл, су күйінше киіп барамыз, тіпті кептірмей. Мысалы, мені шақыртса, қасымдағы фельдшер қалып қалады немесе мен қаламын, себебі, форма жетпейді. Қазір форманың түрін қараңыз, сарғайып, жыртылып кеткен. 

Арызын айтуға жиналғандардың жанына жауапты мамандар да келді. Олар бұған дейін бәріне бірдей берілген қаражат үшінші айда «сағатына қарай бөлінді» дейді. Сондай-ақ, шақыртулардың азаюына байланысты үлестіріліпті. Нақты статистикалық мәлімет жасау үшін бүгінге дейін қанша шақыртуға барған табелі болса, ақшасының үстінен сонша төлейтінін айтады.

Жанар Кенжебаева, Әлеуметтік медициналық сақтандыру қоры Алматы қалалық филиалы директорының орынбасары:

- Алматы қаласы бойынша сәуір айында 15 700 қоңырау келіп түскен болса, мамыр айында ол көрсеткіш 1,2 пайызға төмендеп, 12 600-ге жетті. Ал маусым айын жеке қарастыратын боламыз. Қазір қарсы болғандардың сағатын қайта есептейміз де, комиссия мүшелеріне өткіземіз. Егер есеп сай келсе, ақша төленеді.

Негізінен медицина қызметкерлеріне қауіптілігі аса жоғары, жоғары, орташа деген үш топ бойынша үстеме ақы төленеді. Ал шағымданған қызметкерлер бұл санаттың екінші және үшіншісіне кіреді екен. Осылайша жауаптылар әріптестерінің шағымын қайта тексеріп, арадағы кикілжінді шешуге уәде етті.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!