Тоқаев коронавирус жайлы қауесетке сенетіндер көп деп қынжылды
Төтенше жағдай біткеннен кейін халық босаңсып кетті. Қасым-Жомарт Тоқаев індеттің жаппай таралуына алаңдаушылық білдірді. «Біз біргеміз» онлайн форумында мемлекет басшысы елде әлі де коронавирус жайлы қауесетке сенетіндер көп деп қынжылды.
Автор: Гүлбағда Қайратқызы
23.06.2020
Қасым-Жомарт Тоқаев, Қазақстан Республикасының президенті:
- Төтенше жағдай режимі аяқталған соң, халқымыз босаңсып кетті, аурудың барына сенбейтіндер саны артты. Кейбір азаматтар, оның ішінде мемлекеттік қызметкерлер қауіптің беті сейілді деп ойлады. Біз қауіп-қатерді болжай алмадық. Медициналық талаптарды, ұсыныстарды орындамадық. COVID-19 әлі айтарлықтай қауіпті. Сондықтан Үкімет карантиндік шараларды күшейтті.
Президент қауіпті кеселден көз жұмғандардың отбасыларына көңіл айтты. Елімізде коронавирустан қайтыс болғандардың саны 120-дан асқан. Аурухана керуеттері қос өкпенің қабынуына шалдыққандардан босамай жатыр. Президент бұл ушыққан жағдайды шешуге және медицина қызметкерлерін қорғаныс құралдарымен толық қамтуға уәде етті. Сондай-ақ, ел астанасында коронавируспен күресуге атсалысқандардың құрметіне ескерткіш орнатылмақ. Бүгінгі онлайн форумда жаңа мемлекеттік марапат «Халық алғысы» сыйлығы дәрігер, полицей, волонтер, журналистер мен меценаттарға табысталды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
