Шымкентте өкпе қабынуынан соңғы төрт күнде 24 адам қайтыс болған. Қалада 1-маусымнан бері 360 адам ауруханаға түскен. Бұл белгілісі ғана. Үйінде төсек тартып жатқандар мұнан да көп болуы мүмкін. Оларды емдеуге арналған орталықтар көбейтіліп, жасанды тыныс алу апараттары алынуда. Жедел жәрдем қызметінің 100 бригадасы күндіз-түні жұмыс істеп, пневмониямен ауырғандар үсті-үстіне телефон соғуда.

Ербол Садыр, Шымкент қаласы әкімінің бірінші орынбасары:

- Күніне ЖРВИ, пневмониямен 300 адам дәрігер шақыртып жатыр. Оның ішінде алып келіп, жағдайына қарап, біздегі төсек санына байланысты, негізінен ауыр жағдайдағы азаматтарды біпрінші кезекте қабылдап жатырмыз. Күніне 100 азаматты қабылдап жатыр. Кеше 129 адамды ауруханаға жатқыздық.

Ақтөбеде бір түн ішінде өкпесі қабынған төрт адам қайтыс болды. Қазір 28 науқас жансақтау бөлімінде жатыр. Олардың 10-ы  жасанды тыныс алу аппаратына қосылған. Дәрігерлер пневмонияның аймақта күн санап өршіп бара жатқанын айтады. Былтырғымен салыстырғанда науқастар саны алты есеге көбейді. Бүгінде бұл диагноз 1200-ден астам адамға қойылды. Ал үйден емделіп жатқаны қаншама. Ал дәрі-дәрмек те тапшы.

Светлана Есенаманова, Ақтөбе облыстық ДСБ басшысының міндетін атқарушы:

- Өткен түнде 4 адам қайтыс болды. Оларға алдын ала диагноз – пневмония қойып отырмыз. Қорытынды бір айдан соң белгілі болады. 

Маңғыстау облысында пневмонияға шалдыққандарды жатқызатын орын жетіспейді. Әсіресе Ақтау, Жаңаөзен қалаларында, сондай-ақ Бейнеу ауылында жағдай қиын. Туберкулез диспансерін тез арада жөндеп, өкпесі қабынғандарға бергенімен, ол әп-сәтте толыпты. Сондықтан шенеуніктер облыстық ауруханадағы үш корпустың біреуін провизорлық стационарға айналдыруға мәжбүр болған. Қазір бұл өңірде 450 адам індет жұқтырып ауруханаларда жатыр. Пневмонияның жеңіл түрін жұқтырғандарды тіпті қабылдап та жатқан жоқ.

Жамал Жаманбаева, Маңғыстау облыстық денсаулық сақтау басқармасының басшысы:

- Қазіргі таңда облыста 24 адам қайтыс болды. Осы барлық аталмыш инфекцияның уақытынан бері. Үдемелі дейміз ғой. Әр ауырған адам есепте. Ол есеп күніне екі рет министрлікке беріліп отыр. Жеңіл түрімен ауырсын, ауыр түрімен ауырсын – барлығына есеп береміз.  

Өкінішке қарай пневмонияның қашан беті қайтатынын ешкім дөп басып айта алмайды. Әзірге мамандар барлық қиындыққа дайын болуымыз керек деп отыр. Ол үшін әр аймақтың шенеуніктері өкпесі қабынғандарды қабылдайтын қосымша орындар дайындап, арнайы апараттар алдыруда. Мәселен, бір ғана Шымкентте қазір қолда бар 300 апаратқа қосымша тағы жүз жабдыққа тапсырыс берілді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!