Аида Балаева, ҚР Ақпарат және қоғамдық даму министрі:

- «Абай ТВ» телеарнасы ертең, 30 маусым күні көрерменге жол тартпақ. Ол «Қазақстан» телерадиокорпорациясы құрамына кіреді және елдің мәдени мұрасын насихаттайды. Ал екінші тележоба  білім беру, ағарту бағытындағы «әл-Фараби» телеарнасы. «Хабар» телеарнасының базасында жаңа оқу жылының қарсаңында көрсетілмек. Пандемия кезінде мұндай телеарналардың жоқтығы білінді.

Елімізде бай мәдениетіміз, салт-дәстүрімізді дәріптеп, ағарту ісін насихаттайтын телеарна болған-ды. Мемлекеттік бюджет есебінен қаржыландырылса да, 2016 жылы ол басқа телеарнаға қосылып тынды. Алайда министрлік енді бұқаралық ақпарат құралдарын қолдаймыз деп отыр. Сондай-ақ, биыл отандық ақпарат құралдары салықтан және еңбекақы қорынан міндетті төлемдерден босатылмақ. Болжам бойынша, осы жылы масс-медиа жарнамалық табыстың 60 пайызын жоғалтуы мүмкін.

Аида Балаева, ҚР Ақпарат және қоғамдық даму министрі:

- Бүгінде коронавирустың, пандемия салдарынан бұқаралық ақпарат құралдары экономикалық қиындықтарға тап болуда. Биыл саланың жарнамадан түсетін табысы орта есеппен 30%-дан  60%-ға дейін төмендейді деген болжам бар. Сонымен қоса, Парламент 2020 жылдың 1 шілдесі мен 31 желтоқсаны аралығында коммерциялық теле-радио арналарды аналогтық және эфирлік цифрлық қызмет ақысынан босату туралы заң жобасын қабылдайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!