Алматыда жер үйде газ жарылып, үй иесі қирандының астында қалды
Алматыда жер үйде газ жарылып, бір адам зардап шекті. Ауыр жарақат алған 49 жастағы әйел аурухананың жан сақтау бөлімінде жатыр.
Автор: Салтанат Шырынхан
30.07.2020
Оқыс оқиға кеше кешкісін болған. Төтенше жағдайлар қызметінің болжамынша, үйдегі табиғи газдың аузы ашық қалса керек. Ауаға тараған көгілдір отыннан жарылыс болып, баспананың тас-талқаны шығыпты. Апат орнына жеткен 10-нан аса құтқару қызметкері қирандының астында қалған үй иесін тапқан. Тіпті жарылыс кесірінен жапсарлас орналасқан көршісі де зардап шегіп отыр. Оның да баспанасының жанына қабырға құлапты. Күл- қоқысты жинап жүрген жалғыз баласы мен келіні енді аналарының амандығын тілеп отыр.
Марина Колбасина, келіні:
-Кеше кешке сағат 7-де бізге хабарласып, үйде газ жарылғанын айтты. Бірақ мұншалықты адам шошырлық жағдайда деп ойлаған жоқпыз. Тіпті анамыз ішінде қалып қойған екен. Жақында ғана жөндеу жұмыстарын жүргізіп, осында көшіп келіп, бірге тұруды жоспарлап жүрген едік.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
