Компания бүкіл ел аумағында пандемиямен күреске көмек ретінде дәрігерлерге 100 жедел жәрдем көлігін сыйламақ.

Қаз-қатар тұрған көліктер Жамбыл өңіріне дәл керек шағында жеткізілді. Пандемия кезінде науқастарды ауруханаға шұғыл әрі жедел жеткізуге медициналық машина ауадай қажет.

Бүгіннен бастап қала көшелерінде су жаңа жедел жәрдем көліктері жүйіткитін болады. Машиналардың ішінде фельдшерлерге арналған орын, науқастарға арналған төсек және тыныс алу аппараты да бар. Медициналық құрал-жабдықпен толық қамтылған. Індет өршіген уақытта вирус жұқтырған науқастарға бұл аппараттың ауадай қажет екені айтпаса да түсінікті.

Машиналар  отандық «СарыарқаАвтоПром» автозауытында қысқа мерзімде құрастылырып, жабдықталған. Kaspi.kz компаниясының талабымен өндіріс алдында сынақтан өткізіліп, науқастарды уақтылы, қажетті көмекпен қамтамасыз етуге дәрігерлер мен Денсаулық сақтау министрлігінің сұранысына сай жабдықталған.

Бақытжан Ережепов, Жамбыл облыстық жедел жәрдем стансасының фельдшері:

- Көлікпен бірге электрокардиограмма аппаратының бір түрі келді. Бұнымен жүрек соғысын, инфаркт бар-жоғын тексереміз. Өте ыңғайлы.

Алтынбек Оспанбаев, көлік жүргізушісі:

- Жақсы, ыңғайлы. Әсіресе қаланың ішінде. Қазір қалада көлік көп. Жеңіл, ықшам, Артындағы зімбілі де жақсы. 

Дәрігерлердің айтуынша қазіргі кезде дәл осындай жинақтамадағы автокөліктер жедел жәрдем мамандарына өте қажет.  

Венера Балқыбекова, Жамбыл облыстық жедел жәрдем стансасының бас дәрігері:

- Елімізде карантин болып жатқан кезде үлкен компанияларға алғыс айтқым келеді. Ол – Каспий кз пен «СарыарқаАвтоПром». Көп-көп рақмет!

Kaspi.kz-тің бұл бастамасы еліміз қиын-қыстау кезеңді бастан өткеріп жатқанда өзгеге үлгі болары анық. Жуырда компания Жамбыл облысына тағы сегіз медициналық машинаны беруді жоспарлап отыр. Ал ел бойынша

Kaspi.kz дәрігерлерге жалпы саны 100 жедел жәрдем көлігін тарту етпек.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!