Тәулік бойы елді тамаша әуенге бөлеген әріптестеріміздің басқа тағы қандай жаңалығы бар? Тілшіміз радионың көзге әркезде көріне бермейтін, бірақ даусы танымал қызметкерлерімен сұхбаттасты.    

Қазақстандағы ең танымал әуе толқындарының бірі – «Европа плюста»  тыныштық сақтау керек. Дәл қазір бізге бұл тыныштықты бұзуға рұқсат етілді.

- Кіріңіздер!

- Шымбұлақ шыңында адасып қалған туристердің екі тобы құтқарылды...

Әлия Дүйсекбаеваның даусын алматылықтар жақсы таниды. Өйткені 16 жылдан бері ең басты жаңалықтарды Әлиядан естіп отыр. Таңғы сегізден кешкі жетіге дейін ақпарат оқитын диктор бүгін қобалжулы. Себебі, дауысын енді тек Алматы өңірі емес, бүкіл ел тыңдайды.   

Әлия Дүйсекбаева, «Европа плюс» радиостанциясының дикторы:

- Әрине, қобалжу бар. Ол бірінші кезекте жауапкершілік деп айтсам болады. Өйткені бүкіл республикаға тарағандықтан, Қазақстан халқы тыңдап отырады. Аудиториямыз миллионнан астам халық десек те болады.

Ал радио диджейінде қобалжуға уақыт жоқ. Әр секундты санап, сақ отыр. Себебі, жаңалықты дәл уақытында жіберіп, оның үстіне тамаша әуенмен тыңдарманның көңілін аулауы тиіс.

Жанар Жансейіт, «Европа плюс» радиостанциясының диджейі:

- Қалжың айтатынбыз, алматылықтар ғана түсінетін нәрселерді айтсақ, қазір бүкіл қазақстандықтар түсінетіндей дүние айтамыз. Мәселен, Алматының ауа райы бүгін бұлыңғыр болып тұр, бірақ көңіл-күйіңіз түспесін десек, қазір ондай нәрселерді эфирде айтуға болмайды.

«Европа плюсті» бұдан былай тағы 28 қаланың тұрғындары тыңдай алады. Радиостанция арнасын кеңейтіп қана қоймай, әуе толқынын да жаңартты. Енді алматылықтар сүйікті әндерін 107 фм-нен тыңдай алады. Ал өзге өңірлер өз толқынын «Европа плюстің» сайтынан тапса болады.

Арнұр Ыстыбаев, «Европа плюс» радиостанциясының бас продюсері:

- Бірнеше жылдан бері өзге өңірлердегі азаматтар қайта-қайта радиостанцияға қоңырау шалып, біздің қалада қашан «Европа плюс» қосылады, қашан сіздерді тыңдаймыз деп сұрап жүрді. Тыңдармандардың өтініші орындалды. Енді еліміздің кез келген қаласы, елдімекені біздің әуе толқынын тыңдап, тікелей эфирге қоңырау шалып, хабарласа алады.

Негізі «Европа плюс» 2011 жылға дейін бүкіл елді қамтыған болатын. Араға 9 жыл салып, тыңдармарымен қайта қауышқан радио осыған орай түрлі ұтыс ұйымдастырмақшы. Ал жеңімпаздарға бағалы гаджеттер беріледі. 

Ендеше, бағалы сыйлық ұтып алып, көтеріңкі көңіл-күйде болғыңыз келсе, дәл қазірден бастап «Европа плюс» әуе толқынына қосылыңыз.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!