Терезеден құлап өлген бала саны 5 есеге артқан
Елордада терезеден құлап, көз жұмған балалардың саны бес есеге артып кеткен. Төтеншеліктер мұндай қайғылы жағдайдың жиілеп кетуін ата-аналардың жауапсыздығынан деп отыр. Сондықтан көпқабатты үйлердегі пәтер терезелерін қорғаныш құралдарымен бекітуге кеңес береді.
Автор: Нұрқанат Омарұлы
15.09.2020
Әсіресе 2-7 жас аралығындағы ойын баласы пәтерлердегі терезенің қаупін түсіне бермейді. Сондықтан, әр ата-ана балаларына терезе алдында ойнаудың қаупі жайлы жиі айтуы тиіс. Ал шыбын-шіркей, масадан қорғайтын торкөзді қалқандар құлап кетуден сақтай алмайды. Құтқарушылар жиі ескертіп жатқанымен, нәтижесі шамалы.
Мәселен, ел астанасында былтыр 21 бала терезеден ұшып кетіп, біреуі көз жұмса, биылғы тоғыз ай көлемінде ғана 28 бала дәл осындай қайғылы оқиғаға душар болып, 5 бала жантәсілім еткен. Төтенше жағдайлар департаменті биіктіктің қаупін балалар түгілі ересектер де ескере бермейді деп қынжылады.
Еркін Отарғалымұлы, Нұр-Сұлтан қаласы ТЖД басқарма бастығы:
- Күні кеше кілтін үйінде қалдырып үйіне кіре алмаған ер адам балкон арқылы пәтеріне кірмекші болып, 6-қабаттағы терезеден құлаған. Жарақаттардың салдарынан оқиға орнында мерт болды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
