Анасы мен баласы тұрақтағы 9 көлікті сатып жіберген
Түркістан облысында шетел азаматтарының сеніп тапсырған көліктерін сатып жүрген анасы мен баласы ұсталды. Өзбекстанмен шекаралас Қапланбек бекетіндегі автотұраққа қойылған 9 көлікті екеуі дем арасында сатып жіберіпті. Қолды болған көліктің барлығы да Тәжікстан азаматтарына тиесілі екен.
Автор: Бек Әбиев
21.09.2020
Мамыр айында шекарадағы автотұраққа көлігін қойып кеткен тәжіктер бірнеше айдан келіп, орнын сипап қалған. Бірден полицияға арыз жазылады. Ал тұраққа бас-көз болуы тиіс анасы мен баласы тергеушілерге қылмысын бірден жайып салған. Ұлы бұрын да сотты болған екен. Бөтеннің мүлкін сатуға анасын көндіріп, ақыры көліктің барлығын Шымкент қаласына сатқан. Алты машинаны 5 миллионға сатып, тағы үшеуін бөлшектеп саудаға салып, 2 жарым миллион олжа тауыпты. Ал ақшаның барлығын жаратып үлгерген.
Нығмет Керім, Сарыағаш аудандық ПБ анықтаушысы:
- Жедел іздестіру шарасы нәтижесінде ҚР екі азаматы құрықталып, Шымкент қаласына орналасқан тұрғындардан 9 автокөлік тәркіленіп алынды. Күдікті ретінде ұсталған 2 азамат қамауға алынып, қазір сотқа-дейінгі тергеп-тексеру жүргізілуде.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
