Жыл сайын сырқат балаларына көмек сұрап шырылдайтын ата-ананың саны артпаса, кемитін түрі жоқ. Жай күнде дәрі таппаған ата-ана енді карантинде тіптен қиналып отыр. Өйткені балаларына қажет препарат елімізде жоқ. Ал пандемия басталғалы шетелге шығуға шектеу қойылып, алыстан алдыру қиын. Тапсырыс берген күннің өзінде ұзақ күтуге мәжбүр. Құны да қымбат.

Айгерім Әбдірахманова, Алматы қаласының тұрғыны:

- Баланың тырыспасы тоқтамай, бола береді. Бұл жағдайда тек реанимация көмектесе алады. Егер дәрілерді күнде ішпесе, бала осындай жағдайға түсуі немесе өліп кетуі де мүмкін. Өте қиын жағдай. Сол жағдайға жеткізбеуге тырысамыз. Қолдан келгенше, нан алмасақ та, баламызға дәрі алу үшін барымызды жасаймыз. Күні-түні жұмыс істейміз.

Екі  жарым жастағы бүлдіршінде қояншық белгілері төрт айлығында байқалған. Сол уақыттан бері төсек тартып жатыр. Күн сайын талмасы ұстап жаны қиналады. Ал дәрінің соңғысы ғана қалған.

Юлия Мартынович, Алматы қаласының тұрғыны:

- Бір айда балама 250 мыңнан аса теңге жұмсаймыз. Бұл қаражат дәрі-дәрмекке, сосын массажы мен арнайы тамағына кетеді. Ал еліміздегі тегін берілетін дәрілердің мүлдем әсері жоқ. Сол себепті тіркелмеген препаратты шетелден алдыруға мәжбүрміз.

Тапшы препараттардың бағасын саудагерлер аспандатып жіберген. Ал Денсаулық сақтау министрлігі қажет препараттың мәселесі жақын уақытта шешіледі деп отыр.

Бағдат Қожахметов, ҚР ДСМ ресми өкілі:

- Көптен бері шешімін таппай келе жатқан мәселенін бірі. Аталған дәрілерге сұраныс аз болғандықтан елімізде тіркелмей келді. Мәселе үкімет көлемінде көтерілді. Енді бұнымен балалар омбудсмені мен министрлік айналысады. Жұмыс тобы шешімін табуы тиіс. 

Бүгінде эпилепсиямен ауыратындардың көп бөлігі – бүлдіршіндер. Ата-аналар мәселенің министрлікке жеткеніне қуанып отыр. Алтынға бергісіз дәрілерге енді қол жеткізуі оңайырақ болады деп үміттенеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!