Телефонын қуаттаймын деп қыршынынан қиылған Ақерке – Қарғалы ауылының тұрғыны. Ол өткен сенбіде смартфонын тоққа сұғып сыныптасымен сөйлесіп жатқан екен. Кенет бойжеткенді тоқ соққан. Мұны көрген жақындары дереу жедел жәрдем шақырады. Алайда 10-сынып оқушысы оқиға орнында жан тапсырыпты.

Ақылжан Өмірбаев, марқұмның әкесі:

- Телефоны балқып кеткен, телефонның іздері бетінде қап-қара болып тұр. Телефон арқылы тоқ ұрып, құлақ жағынан миына әсер еткен, миынан сразу жүрекке барған. Жүрегі сол кезде тоқтаған деді ғой.

Бауыр еті баласынан айырылып қабырғасы қайысқан әке үйдегі электр желісінде ешқандай ақау болмағанына сенімді. Сол күні де басқа техника күймеген. Сондықтан қайғылы оқиғаға сапасыз қуаттағыш себеп деп топшылайды.

Марқұм соңғы телефон қуаттағышын ауыл ішіндегі базардан бір ай бұрын сатып алған. Расында, мұндай жерлерден смартфонның кез келген түрін қуаттайтын құрал табылады. Алайда сапасы мен қауіпсіздігіне ешкім кепіл бермейді. Сондықтан ұялы телефон жөндейтін мамандар қуаттау құрылғысын көрінген жерден сатып алмау керектігін ескертеді.

Александр Гросс, телефон жөндеуші:

- Мұндай жағдай көбіне сапасыз қуаттағыш қолданғаннан, құрылғыны дұрыс пайдаланбағаннан, не болмаса жасырын зауыт ақауынан болуы мүмкін. Сондықтан қуаттағыштың түпнұсқасын қолдану керек. Не болмаса, ең сапалысын таңдау қажет.

Қазір бойжеткеннің қуаттау құрылғысы мен балқыған телефоны сараптамаға жіберіліп, тергеу басталған.

Ақбота Қуанышбекқызы, Алматы облыстық ПД ресми өкілі:

- Алғашқы болжам бойынша қыз қуатталып тұрған телефон арқылы тоқ алған. Қазір аталған дерек бойынша адам өліміне қатысты сотқа дейінгі тергеу басталды. Тиісті сот-медициналық сараптама тағайындалды.

Қайғылы оқиғаның нақты себебін сараптама қорытындысы көрсетпек. Ал  қыршынынан қиылған бойжеткен кеше жер қойнына тапсырылды. Ол бір айдан кейін 16 жасқа толуы тиіс еді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!