Финалдан кейін араға екі күн салып жас әншілер гала-концертте өнер көрсетті. Музыкалық спектакль форматында өткен кеште олар авторлық әндерді орындады. Әуенді нақышына келтіріп шырқаған бүлдіршіндер шынында  додаға лайық екендігін дәлелдегендей.

Кіл жүйрікте кім жүйрік екенін анықтау қазылар алқасына да оңайға соқпады. Бірінен бірі өтетін өнерпаздардың арасынан таңдау маңғыстаулық Армен Саакянға түсті. 12 жасар бала осылайша бесінші маусымның гран-при иегері атанды. Ол Диснейлендке жолдама алып, сонымен қатар «Шабыт» Ұлттық өнер университетінің грантын жеңіп алды.

Армен Саакян, «Бала дауысы» ұлттық ән байқауының жеңімпазы:

- Қуанышымда шек жоқ. Жеңімпаз боламын деп ойлаған жоқпын. Маңғыстау өңірі бірінші рет «Бала дауысы» байқауын ұтты. Бәріне алғысым шексіз! Маған дауыс берген, қолдаған адамдарға рақметімді айтамын!

Бірінші орын ақтөбелік Айдар Аққұловқа бұйырса, күміс жүлдені павлодарлық Лейла Цечоева мен жамбылдық Бекмұхамед Ғазизжанұлы бөлісті. 2016 жылдан бері «Бала дауысы» талай баланың арманын орындап келеді. Ары қарай да солай болмақ.

Толғанай Хасенқызы, «Бала дауысы» ұлттық байқауының ұйымдастырушы мүшесі:

- Біздің іріктеуіміз жыл сайын наурыз айында басталады. Біздің ережеміз еш өзгермейді. 8-12 жас аралығындағы балалардың барлығы бірдей қатыса алады. Келесі жылы бұйыртқанын көреміз, қалай болатынын.

«Бала дауысы» – талантты жастың бұлақ көзін ашар қайталанбас байқау. Ұйымдастырушылар осындай өнерпаздарды дайындаған ата-аналар мен ұстаздарына ерекше алғысын айтады!

Бізді Youtubе-та қараңыз! Бізді Facebook-та, Instagram-да, Telegram-да оқыңыз!