Алматылық Фархат Сандыбаев карантинде тамаққа онлайн тапсырыс беруге әдеттенді. Бірақ, оны жеткізушілердің көбіне тазалыққа немқұрайлы қарайтыны шамына тиген.

Фархат Сандыбаев, Алматы қаласының тұрғыны:

- Біразының арнайы қолғабы болмайтыны, бетперде тақпайтыны мені қайран қалдырды. Тіптен, ескерту жасаймын деп керісіп те қалған кез болды. Ал, сол тамақты мен одан кейін қалай уайымдамай жей алам? Сондықтан, қазір өзім барып алып кетемін.

Эпидемиологтар да вирус алыстан емес, осы тамақ жеткізушілерден келетінін дабыл қағып айтып жатыр. Клиенттер көңіліне күдік ұялатпас үшін қолдарында міндетті түрде санитарлық кітапшасы болу керек деген пікірде. Әрине, бәріне топырақ шашпайды. Бірақ, компания әр қызметкерін қатаң қадағалап, тексеріп отырмаса коронавирустан бөлек, ішек ауруларын таратудың қаупі үлкен екен.

Сәкен Әміреев, эпидемиолог:

- Біреуге берерде бүйтіп сөмкесін ашып, қолына береді ғой. Сол кезде оның қолы ластанған болса оны ұстаған адам соны ашады. Сол кезде оның да қолы ластанады. Ол мысалы үшін дизентерия деген, сальмонеллез деген аурулар бар, ішек инфекциялары көп олардың эрсениоз деген аурулар бар. Солардың қай қайсы да болса да осындай ластанған қол арқылы, нәжіс арқылы жұғады.

Пандемияда тасы өрге домалаған тамақ жеткізуші компаниялар мұнымен келіспейді. Тапсырыстың көптігінен, қосымша жұмыс күшін тартуларына тура келген. Бірақ, жанталаспен жұмыс істегенмен тазалық бірінші орында дейді олар.

Расул Индирбаев, тамақ жеткізуші компанияның өкілі:

- Негізгі талаптар-санитарлық кітапшасы болуы шарт. Оның жарамдылық мерзіміне мұқият қараймыз. Курьерлерімізге күнделікті тегін бетперде мен қолғап таратамыз. Егер де талапты сақтамай клиентке барса бірден айыппұл салып, жұмыстан шығарамыз.

Бұл мәселедегі пікір екіге жарылып тұр. Тамақ жеткізуші компаниялар өздеріне шаң жұқтырмағанмен, шағым айтушы клиенттердің қарасы көп. Қалай дегенмен де, эпидемиологтар, мейлінше тапсырыс бермей, сақтануға шақырады.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!