Жедел жәрдем қызметкерлерінің жайын Нұрқанат Омарұлы айтып береді.   

Қалалық теміржол ауруханасының жедел жәрдем қызметкерлері күн-түн демей, тиісті міндеттерін атқарып жүр. Бірақ, тиесілі үстемақыны уақытылы алу мұңға айналған. Басшылық екі айдан бері құр уәдемен тойдырып келе жатыр дейді наразы қызметкерлер.  

Шыңғыс Тайшықарин, фельдшер:

- Күтіңдер. Әзірге бізде ақша жоқ. Бюджетте, ақша жоқ, мында ақша жоқ дейді. Енді менің түсінбейтінім, басқа емханалар қалада алады. Мысалға, 14 емхана болсын, 10-шы емхана болсын олардың барлығы алған. Енді біз бухгалтерияға өзімізді ақшамызды алайық деп барсақ, олар бізге нақты жауап қайтармайды. Қалай сонда, біз өзіміздің ақшамызды өзіміз ала алмаймыз. Әлде қалада бақылау жоқ па? Үстеме беріп жатса 400-500 мыңнан соны қарайтын комиссиялар жоқ па мен соны түсінбедім.

Үстемақының 2 ай бойы кешіктірілу себебін нақтылауға кірістік. Бөлек ғимаратта отыратын есеп бөлімін алынбас қамал дерсіз. Жұмыс күні екеніне қарамастан есікті іштен құлыптап алған.

Әрі-беріден соң есік те ашылды, әйтеуір. Бірақ, мәнді жауап аламыз деген үміт  су сепкендей басылды. Бухгалтерлер ішкі есікті ашпай қойса, бас дәрігер орнында жоқ. Орынбасары 8 жарым минллион теңгедей үстемақының 2 ай бойы кешіктірілуінің мәнін өзінше түсіндіруге тырысты.   

Николай Ким, Орталық темір жол ауруханасы директорының орынбасары:

- Мәліметтер ағынын орталықтандыруға келгенде бірқатар қиындықтар бар. Салдарынан қыркүйек айы үшін жұмыс істеген жедел жәрдем бригадаларының табелін емхана тарапы дұрыс бермеді. Ол деректерді тек қазанда алдық. Оны өңдеп, үстемақыға қайтадан өтінім жібердік. Ақша түсті. Міне, осы қараша айында береміз.

Бұл жауапқа жедел жәрдем қызметкерлерінің көңілі толмады. Өйткені, тағы әлдебір сылтаумен кейінге шегеріледі деп көңілдері күмәнді. Соған қарағанда басшылық берген уәденің құны көк тиын. Бірақ осы жолғы сөздерінде тұрады-ау деген үміттері де жоқ емес.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!