Ал ковид жұқтырғандармен қарым-қатынаста болып карантинге түскендер мен өздігінен жүре алмайтын науқастарға дауыс беру жәшіктері үйіне жеткізіліп жатыр.  

Жамбыл облысында жалпы ковид жұқтырды деген күдікпен үй карантинінде 900-ден аса адам бар. 400-ден аса науқас ауруханада дауыс берді. Тараздағы барлық стационарда арнайы дауыс беру учаскелері қажетінше жабдықталған. Комиссия мүшелеріне қиындық туғызған жалғыз жағдай  ковидтен қорғайтын арнайы киім кию болды. 

Азат Сәтжанов, Жамбыл облыстық көпсалалы балалар ауруханасының бас дәрігері:

- Комиссия мүшелері арнайы костюм киіп, қорғаныш құралын қолданып сайлау ұйымдастырылуда. Науқастардың конституциялық құқықтарын орындауға инфекциялық аурухананың инфекциялық блоктың өзгешелігіне орай, аурулардың төсектерінің қасында сайлау учаскесіне дауыс бере алады.

Ал жансақтау бөліміндегі дауыс берем деушілерге арнайы жәшік жатқан жеріне жеткізілді.

Аяжан Түпекова, Тараз қаласының тұрғыны:

- Қазір біз ашық түрде дауыс бердік. Мен осы ауруханаға өте ауыр күйде түскенмін. Бірінші Алланың, екінші осы ақ халатты жандардың арқасында аман қалдым.

Қарағандыда таң атысымен барлық стационарларда дауыс беру науқаны ойдағыдай басталды. Санитарлық талаптар да қатаң. Мұнда ковидтен 307 адам емделіп жатыр. Науқастардың дауыс беруін қадағалауға бір ғана сайлау комиссиясының мүшесі кірді. Арнайы қорғаныш киімін киіп, бетперде таққан ол науқастарды дауыс беру ережесімен етене таныстырды.

Ауруханада дауыс бергендердің дені қарттар, ыстығы көтеріліп, әлсіреген науқастар. Ал төсектен тұра алмай жатқандарына сайлау жәшігі қол созым жерге жеткізілді. Науқастар дауыс бегеннен соң бюллетень жәшігі 15 минут бойына кварцпен залалсыздандырылады.

Соңғы мәліметтерге сүйенсек, Ақмола мен Павлодар облысы кеселдің таралуы жағынан «қызыл аймақта». «Сары аймаққа» Нұр-Сұлтан, Алматы Батыс және Солтүстік Қазақстан облыстары кірген. Қалғандарының жағдай жеңіл. Сөйте тұрса да Қарағанды облысында ковид жұқтырғандармен қатынаста болған 1200 ден астам адам үйде қамалып отыр. Сайлау комиссиясындағылар кешке дейін ел бойынша осындай сан мыңдаған мекенжайды аралап шығуы тиіс.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!