Амалы таусылған ата-аналар елімізде тіркелмеген дәрі-дәрмекті Чехия, Түркия немесе Бельгиядан тапсырыспен сатып алуға мәжбүр. Бірақ Ресей арқылы жететін препараттардың бағасы бірнеше есеге қымбаттап кетеді екен. Сондықтан ата-аналар Денсаулық министрлігінен шипасы мол дәрілерді тіркеуге алып, тізімге енгізуді талап етіп отыр.

Эпилепсия дертіне шалдыққан алты жасар Даутжан Розахунов өзгенің демеуімен әрең жүріп-тұрады. Өздігінен тамақ іше алмайтын баланың тілі де шықпаған. Ұлының ауық-ауық талмасы ұстағанда шыбын жаны шырқырайтын Диана Тұрдыбекқызы шет елден арнайы алдыратын дәріден үміт күтеді. Себебі эпилепсия меңдеген жеткіншектерге берілетін елімізде тіркелген препарттар түк көмектеспеген көрінеді. 

Диана Тұрдыбекқызы:

- Ұлым сегіз жарым айлығынан бастап осы дертпен ауырды. Содан бері емханадан тегін берілетін барлық дәріні қолдандық. Қазақстанда тіркелген препарттардың бірде-бірінің көмегі тиген жоқ. Кейін тізімде жоқ басқа дәріні пайдаланғанда оң нәтиже беріп, баламның талмасы азайды.

Ал тоғыз  жастағы Аня үш жылдан бері аталған аурдың зардабын тартып келеді. Анасының айтуынша бармаған жері, баспаған тауы қалмаған. Мемлекет тарапынан тегін берілетін дәрі-дәрмектен шипасынан күдерін үзген шарасыз ана жауапты министрлік басқа препараттарды тіркеуден өткізсе екен дейді.  

Вера Тюлюкина:

- «Сабрил» немесе өзге де елімізде тіркелмеген дәрілерді тізімге қосса екен деп жалынып сұраймыз. Оны емханаларда тегін беру керек қой. Өмір сүруге ұмтылаған балаларымыздың қуануға, өзгелер секілді ойнап-күлуге қақысы бар.

Жанары жасқа толған ата-аналар еш жерде сатылмайтын дәрілерді Түркия, Чехия және Бельгиядан тапсырыс арқылы алады. Бірақ Ресей арқылы жететін препараттар қасқалдақтың қанындай қымбат. Баланың жасына қарай бір айлық қабылдайтын дәрінің құны 50 мыңнан басталып 150 мың теңгеден асып кетеді. Ата-аналардың жанайқайын дәрігерлер де қоштайды.  

Ирина Чулкова, эпилептолог:

- Ковид-19-ға қарсы вакцина ойлап тауып жатқан жоқпыз ғой. Барлығы әлемдік тәжірибеде кездесетін дәрі-дәрмек қатарына кіреді. Заманға сай препарттар десек те, біз олтуралы ештеңе білмейміз.

Қоғамдық ұйым өкілдерінің айтуынша, салғырттықтың кесірінен елімізде аталған дертке ұшыраған кішкентайлардың нақты тізімі жоқ. Бірақ бір ғана Алматыда 218 бала мемлекет көмегіне мұқтаж. Қоғам  белсенділері мемлекет балалардың құқығын шектеп отыр деп есептейді.  

Светлана Киричкова, «Кең жүрек» қоғамдық қорының директоры:

- Қазір Қазақстанда эпилепсия ауруын емдеуге қатысты 6 дәрі тіркелген. Алайда әр адамның денсаулығына байланысты көбісі олардан сырт айналды. Өткен жылы емдеу хаттамасы өзгеріп, 14 препарат тізімге енгенімен қуанышымыз көпке созылмады.  Бағы жартас сол күйінде қалып қойды.

Алайда денсаулық сақтау министрлігі аталған жайтқа қатысты әзірленген жобаның талқыға түсіп жатқанын айтқаннан басқа мардымды жауап қатпады. Бірақ баласының өміріне алаңдаған ата-аналар мен қоғам белсенділері ақырына дейін күресуге бел байлап отыр.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!