Бірақ куәгерлер мен жүргізушілер жол бойындағы қоқыс полигонынан шыққан түтін төңіректі басып қалғанын айтады. Оған қалың тұман қосылып, көру қашықтығы қиындап кеткен.

Алматы-Қапшағай тас жолындағы көлік апаты өткен түнде болған. Арақашықтықты сақтамаған «МАН» жүк көлігінің иесі жылдамдықты асырғанда алдындағы көлікке соғылады. Соның кесірінен жүйткіген өзге көліктер бірін-бірі кимелеп қыстырылып қалған. 

Бақытқали Ошырақын, оқиға куәгері:

- Екі-үш шақырымдай ештеңе көрінбейді. Басқа жер жап-жарық. Көзге түрткісіз жерде бір машина келіп ұрған. Ұрған машиналар көп ол жерде.

Полицияның айтуынша, Байсерке ауылының маңындағы тас жолда 7 көлік соқтығысқан. Бірақ куәгерлер көлік саны одан да көп болуы мүмкін дейді. Алғашында апатқа тас жолдың тайғақтығы себеп деген болжам жасалған. Ал  «Қазавтожол» өкілдері бұл байламды жоққа шығарады. Себебі, жол бойындағы қоқыс полигоны өртеніп, төңіректі қою түтін басып қалған. Оған қалың тұман қосылыпты. Мұны көлік иелері де растап отыр. 

Айдана Айдынқызы, «Қазавтожол» АҚ Ақылы автомобиль жолдары дирекциясының баспасөз хатшысы:

- «Қазавтожол» ҚК АҚ Алматы-Қапшағай уаческесінде жол-көлік апаты болған кезде көк тайғақ болмағанын хабарлайды. Тазаланған, үш жолақта қауіпсіз әрі кедергісіз көлік қозғалысы қамтамасыз етілген.

Абырой болғанда жұртты дүрліктірген апаттан адам шығыны жоқ. Алайда «Қазавтожол» тарапы жол-көлік оқиғасынан үш адам зардап шекті десе, тәртіп сақшылары екі жолаушының жарақат алғанын айтады.

Қуанышбекқызы, Алматы облыс ПД ресми өкілі:

- Көліктердің бірі екі жүргіншіні қағып кеткен. Бірақ зардап шеккен жүргіншілерге оқиға орнында қажетті медициналық көмек көрсетілді. Аталған жол апаты бойынша әкімшілік хаттама толтырылып, шешім қабылдау үшін сотқа жіберілді.

Көлігі апатқа ұшырағандар арасында қосымша шығынға батқандар жоқ емес. Мәселен, мал тиеп Алматыға бағыт алған жүк көлігінен  екі сиыр өлген. Ал полицейлер жүргізушілерге жол ережесін мүлтіксіз орындап, сақ болуды ескертеді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!