«Кез келген кәсіптің мақсаты – табыс табу». Осылай деген жеке меншік дәріхана иелері шекті бағаға түбегейлі қарсы. Өйткені ол кәсіпкерлерді шаш етектен шығынға батырады деп есептейді. Айтуларынша тізімдегі дәрілердің тең жартысына тым төмен баға белгіленіпті. Оны министрліктің неге бұлай бекіткенін фармацевтер түсінбей отыр.

Мәдина Тұрысбекова, дәріхана қызметкері:

-Баға өте төмен. Біз алған бағадан 25 пайызға төмен. Қан-айналымына қатысты дәрі, оның қазіргі бағасы шектеулі 3360 теңге. Ал біз сатып алған бағамыз шамамен 4260 теңге.

Тізімде коронарусқа түк қатысы жоқ дәрілер де бар екен. Ал бүгін күшіне енген талапқа дәріхана иелері «бағынбаймыз» деп бекініпті. Яғни дәрі-дәрмек бағасын өзгеріссіз ұстап отыр.

Ажар Абдуллаева, дәріхана қызметкері:

-Шектеулі баға деген заңды алып тастағанын сұраймыз. Бұл бағаны қоюға нарық өзі реттеп береді. Біз ешқандай пайда көре алмаймыз. Онда жабылуға тура келеді.

Коронавирусқа қарсы препараттарға енгізілген шекті бағаның арты дәрі тапшылығына әкелуі әбден мүмкін. Өйткені бұлардың нарықтағы бағасы шекті бағадан асып түсетін дәріні дистрибьютордан сатып алуды доғаруына тура келеді. Сәйкесінше тасымалдаушының өндірушіге тапсырысы азаяды. Сөйтіп ұсыныс та бәсеңдейді. Десе де денсаулық сақтау министрлігіндегілер шекті бағаны бекітпес бұрын нарық жіті зерттелді дейді. Әрі бұл шара дәрі-дәрмектің тұтынушыларға қолжетімді болуы үшін қолға алынған.

Ботагөз Сыздықова, ҚР ДСМ Дәрі-дәрмек саясаты департаменті директорының міндетін атқарушы:

-Бағаны мейлінше арзандату үшін маркетингке кететін шығын мен көтерме-бөлшек саудадағы құн төмендетілді. Шекті бағаның сақталуын тексеру кезінде әр жағдайды жеке қараймыз. Тек қана дәріханалар желісі емес, дәрі өндірушілер мен оны жеткізушілер де тексеріледі. Яғни шектік бағаны қалыптастыру үшін бәрін бақылауда ұстаймыз.

Былтыр коронавирус күшейген кезде дәрі-дәрмекті бейберекет қымбаттатып жібергендер көп болды. Сөйтіп олар қомақты айыппұл арқалады. Бұйрыққа бағынбағандар бұл жолы да жазаланады. Ал жағдай бірнеше рет қайталанса, дәріхананың лицензиясыз қалуы әбден мүмкін.

Шекті баға енгізілгенде 200-ден астам дәрі шамамен 27 пайызға арзандайды деп күтілген. Бірақ бұған қашан қол жеткізетініміз белгісіз. Өйткені дәріхана иелері құжатты қайта қарауды сұрап жауапты орындарға хат жолдаған. «Әйтпесе көп ұзамай дәріханаларды жабуға тура келеді» - дейді фармацевтер.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!