Азат Перуашев: «Бұл екі мекеме бизнесті тұншықтыруды ғана біледі»
Мәжілісмендер жемқорлыққа қарсы агенттік пен экономикалық тергеу қызметіне де шүйлікті. «Екі мекеме бизнесті тұншықтыруды ғана біледі» - дейді Азат Перуашев. Ал экономикалық қылмыспен күресетін тағы бір агенттіктің құрылуы сұрақты одан бетер көбейтуі мүмкін екен. Сондықтан депутат жаңа агенттіктің қызметін қайталайтын болса, алдығы екеуін қысқарту қажет деген пікірде.
Автор: Сымбат Ғалымбекұлы
27.01.2021
Азат Перуашев, Мәжіліс депутаты:
-Елімізде осыған ұқсас мәселемен айналысатын екі мемлекеттік орган – Сыбайлас жемқорлыққа қарсы іс-қимыл агенттігі және Экономикалық тергеу қызметі бар. Олардың қызметі қандай да жолмен бизнеске қысым жасаумен байланысты. Өткен жылы "Ақ жол" фракциясының сұрауы бойынша Бас прокуратура 16 заңсыз қылмыстық істі тоқтатты және кәсіпкерлердің заңды құқығын бұзғаны үшін экономикалық тергеу қызметінің 150 адамын жауапқа тартты.
Мәжілісменнің сөзінше, бір-бірінің қызметін қайталайтын органдардың өкілетілігін реттемесе, онсыз да пандемияда пайдадан қағылған бизнеске кері әсерін тигізеді.
Күні кеше Қасым-Жомарт Тоқаев үкіметке көлеңкелі бизнесті жойып, салықтан әдейі жалтаратындармен күресті күшейту керектігін мәлімдеген. Мемлекет басшысы осы мақсатта президент жанынан Экономикалық қылмыстармен күрес агенттігін құруды да тапсырды.
1994 жылы жасақталған осындай агенттік 2014 жылы таратылған болатын. Ал президент міндеттеген тапсырманың қашан жүзеге асырылатыны әзірге белгісіз.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
