Эдуард Половников, Петропавл қаласының тұрғыны:

- Құлағалы тұрған үйге қалай күрделі жөндеу жүргізеді? Ертең бесінші қабатта отырып, бір сәтте бірінші қабаттан бір шықпасымызға кім кепіл? Осындай қорқынышпен күн кешеміз ғой. Бізге бұрын қандай бөлмеде тұрсақ, сондай бөлме берсін. Соған шүкір етер едік.

Газ баллоны жарылған көп қабаты үйдің алпысқа жуық тұрғыны қазір университеттің жатақханасында тұрып жатыр. Қақаған қыста далада қалғандар ол жақтағы жағдайдың мәз емес екенін айтады. Уақытша тұрақтары қара суық. Онымен қоса ас әзірлеу жағы қиын. Өйткені студенттер жатақханасында электр қондырғыларын қолдануға тыйым салынған. Ал шенеуніктер уәде еткен жөндеуден кейін қауіп сейіледі дегенге сенбейді. Себебі, ескі үйдің жарылыстан бұрын да қабырғалары сөгіліп тұрған. Қанша жерден жамаса да тұруға жарамайды дейді  тұрғындар.

Екі күн бұрын бұл үйдің төменгі қабатындағы дәмханада газ баллоны жарылып, екі адам мерт болған. Он адам жарақат алып, сегізі ауруханада жатыр. Ал әкімдіктегілер жарылыстан зардап шеккен тұрғындарға жылу жинап жатқанын айтты. Әзірге ақшалай көмек берген ешкім жоқ. Көбі киім-кешек пен азық-түлік әкелуде. Шенеуніктер алты бірдей компаниямен келісімшарт жасап, үйді күрделі жөндеуден өткізуге әзір отыр.

Асқар Хабибулин, Петропавл қаласы әкімінің орынбасары:

- Тұрғындарға жүз айлық есептік көрсеткіш көлемінде өтемақы беріледі. Оған қазынадан қаражат қарастырылған. Ал үйдің қауіпсіздігіне қатысты сараптама қортындысын күтеміз. Әзірге олар бізге жылу құбырлары мен терезе бағаналарын қалпына келтіруге рұқсат берді. Алда қандай жұмыс жүргізетініміз сол сараптамаға байланысты болады.   

Бізді Youtubе-та қараңыз! Бізді Facebook-та, Instagram-да, Telegram-да оқыңыз!