Леңгір қаласындағы жекеменшік мектепте болған  жағдай. Сынып ішінде бірнеше оқушы бір баланы тепкілеп жатыр. Омақаса құлаған Егорды сыныптастары басынан да , ішінен де тебеді. Оқушылар төбелесі бейнекамераға түсіп жатқанымен, оны бақылайтын адам жоқ сияқты. Себебі, төбелескендерді ажыратқан жан болмапты. Тіпті таяқ жеген балаға мектепте еш көмек көрсетілмеген. Жедел жәрдемді үйіне жеткенде жақындары шақырыпты.

Татьяна Галкина, жәбірленуші оқушының анасы:

- Мен ол кезде жұмыста едім. Қызым телефон шалып, Егор мектептен таяқ жеп келгенін айтты. Басы ауырып, мұрны қанап жатыр және лоқсып жатыр деген соң ауруханаға жеткіз дедім. Жалпы балама осыған дейін де сыныптастары шашын өртеп, қайшы тықпақшы болған. Біздің материалдық жағдайымыз төмен болған соң басынған шығар.

Сыныптастарынан таяқ жеген 9 жасар бала қазір ауруханада жатыр. Жекеменшік «Мейр-Бейс» мектебі былтыр қыркүйекте ашылған. Бүкіл білім ордалары онлайн оқып жатқан кезде жалғыз осы мектеп қана дәстүрлі білім беріпті. Қаржыландыру мемлекеттен болғандықтан, ата-аналар да баласын осы мектепке берген. Бірақ мектепте не болып жатқанын ешкім білмейді. Өйткені жекеменшік нысанға аттап басуға рұқсат жоқ.

- Ойнаған! Ау, сіздер бала кездеріңізде асыр сап, жұлысып ойнамадыңыздар ма?

Оқушылардың ісін озбырлық емес, «жәй ғана әзіл» деген мектеп басшылығы ешкімге есеп бермейді екен. Тіпті Төлеби аудандық білім бөлімінің басшысы да мектепке бас сұға алмады. Сондықтан Роза Аманова өзімбілемділікке салынған мектепке тексеру жүргізбекші.

Роза Аманова, Төлеби ауданы білім бөлімінің басшысы:

- Ешқандай есеп бермейді, не директорының, не оқу бөлімінің меңгерушісінің кім екенін білмейміз. Аудан оқу бөліміне келіп байланыс орнатқан емес. Бір басқарма табылатын шығар. Жекеменшік екенін түсінеміз. Барлық жекеменшік мектептерге қаржы бөлінеді. Бірақ әр баланы мемлекет тапсырысымен, үкіметтен қаржыландырып отыр. Сондықтан бейжай қалдырмай, қарауымыз керек.

Онлайн оқуға компютері болмай, тегін шақырған жекеменшік мектепке барған Егор екінші сыныпты енді ауруханада аяқтайды. Миы шайқалған балақайды осы аптада Леңгірден Шымкенттің балалар ауруханасына ауыстырады. Ал оны «ойнап тепкен» сыныптастарына ештеңе болмайды. Себебі – кәмелетке толмаған. Балаларды былай қойғанда, полицейлер  мектептегі ересектерге де тек ауызша ескерту беріп қайтарған.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!