Ректордың коллекциясына қатысты төрт айлық тексерістен кейін полиция қылмыстық іс қозғады.

Салтанат Әзірбек, Алматы қаласы полиция департаментінің ресми өкілі:

- Аталмыш қылмыстық іс қазір Алмалы аудандық полиция басқармасында тергелуде. Тиісті тергеу амалдары мен сараптамалар жүргізілуде. Қылмыстық іс жүргізу кодексінің 201-бабына сәйкес,тергеу реті және басқа да мән-жайлар жария етілмейді.

Білдей Спорт және туризм академиясының президентіне қатысты жанжал қаңтарда шыққан. Белгілі спортшы Жанқош Тұраров Қайрат Закирьяновпен бірге түскен суретін әлеуметтік желіге жүктеп, байқамай басшының бағалы коллекциясын бүкіл елге жария қылған. Басшының терілерді сонау Африкадан атып әкелгені белгілі болды. Зебра, кенгуру, аю, антилопа, тіпті керіктің терісін аяқ астына кілем етіп төсейді екен.

Тергеушілердің сұрағы қар барысы мен түркістандық сілеусіннің терілері және қабырғадағы аққуларға қатысты. Суретте көрініп тұрғандай, академия президенті Қызыл кітапқа енген жануарлардың бірін жиһаз, енді бірін төсеніш ретінде қолданған. Басы дауға қалған басшы терілерді «таныстарым сыйлады» деп, бастапқыда жауаптан жалтарған болатын. Тіпті «жасанды» деп те жұртты шатастырмақ болды. Алайда полицияның қылмыстық іс қозғауына қарағанда терілер жасанды емес. Ал оқу орнының басшысы терілерге қатысты қандайда бір сұхбат беруден бас тартты. 

Әлия Бейсебаева, Қазақтың спорт және туризм академиясы президентінің баспасөз хатшысы:

- Бұл жағдай бойынша түсініктеме беруден бас тартамыз. Бұған дейін айтқанымыздай, қар барысының терісі академия басшысына сыйға тарылған. Қазақ туризм және спорт академиясының президенті өзі қалаған кезде мәселенің мән-жайын түсіндіріп сұхбат береді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!