Ел президенті Режеп Тайып Ердоған қасиетті Рамазан айында шектеу шарасын одан сайын күшейтті. Дерт дендеген Түркиядағы қазіргі ахуалды шетелде жүрген отандастарымыздан сұрап білдік.  

Түркияда жұқпалы дерт қайтадан дендеп барады. Өткен аптадан бері аталған мемлекетте күн сайын 50 мыңнан астам адамнан ауру анықталып жатыр. Бұл пандемия басталғалы рекордық көрсеткіш. Жергілікті билік наурыз айында қауіпті кесел кеулеген соң, коменданттық сағат енгізілген. Анкарада білім алып жүрген отандасымыз қасиетті Рамазан айында шектеу шаралары тағы күшейтілгенін жеткізді. Мархабат Ілияс көшеде сақтық ережелерін қатаң сақтауға тырысамыз дейді. Себебі, бетпердесіз жүргендерді полиция әкімшілік жазаға тартады.

Мархабат Ілияс, студент:

- Егер бетпердесіз жүрсек, 9 лира – 50 теңге айыппұл салынады. Түркияда коронавируспен күрес шаралары жалғасуда. Кешеден бастап кафе, мейрамхананың барлығы жабылды. Тапсырыспен ғана жұмыс істейді. Коменданттық сағат кешкі сағат тоғыздан таңғы сағат беске дейін. Апта соңында көшеге шығуға тыйым салынды. Апта соңында тек дүкен мен дәріханаға бара аламыз.

Түркияның денсаулық сақтау министрі 7 миллион адам коронавирусқа қарсы вакцинаның екі компанентін алып үлгергенін мәлімдеді. Фахретттин Кожа елде вирустың «британдық» және «бразилиялық» штаммы жылдам таралып, эпидахуал ушыққанын ескертті.

Қазір отандық туроператорлар Түркияға жолдама алған туристердің рейсін маусым айына ауыстыруға мәжбүр.

Инна Рей, «Туристік қамқор» қорының төрайымы:

- Қазір турпакетпен Түркияда демалып жүрген 200 отандасымыз бар. Олардың денсаулығына алаңдайтын негіз жоқ. Себебі, Түркия туристерге барлық жағдай жасайды. Оған күмәніміз жоқ. Қазір алдын ала төлем алған туристердің демалысын келесі айға шегеріп жатырмыз. Түркиядағы эпидахуалды бақылаймыз. Бірақ ПТР-тест арқылы елге оралсақ, қазір бұл талап барлығына міндетті. Сол кезде бәрі дұрыс болады.

Ресей мемлекеті күні кеше ғана сәуірдің 15-інен маусымның 1-іне дейін Түркиямен әуе байланысын шектеді. Мәскеу мен Ыстамбұлдан аптасына тек 2 рейс жүзеге асырылады. Ауру асқынған Түркиямен әуе рейсін қысқарту мәселесі Қазақстанда да талқыланады.  

Ержан Байтана, Санитария-эпидемиология бақылау комитетінің ресми өкілі:

- Түркиямен әуе қатынасты тоқтату немесе қысқарту бойынша мәселелердің шешімі тек қана ведомствоаралық комиссияның шешімімен шығады. Бүгін, ертең комиссия отырысы өтеді. Сол уақытта шешім шығады. Қазір Түркия және басқа елдермен әуе қатынасы тоқтатылған жоқ.

Қазір әлемнің түкпір-түкпірінен туристер ағылатын Анкара, Ыстамбұл, Анталья қалаларында індет өршіп тұр. Соңғы тәулікте Түркияда аурудан 243 адам ажал құшып, коронавирус құрбандарының жалпы саны 34 мыңнан асып жығылды. Жергілікті тұрғындар бүгін президент  Режеп Тайып Ердоғанның қатысуымен өтетін үкіметтің отырысын асыға күтіп отыр. Өйткені дәл осы жиында қауіпсіздікке қосымша шектеу шарасы жариялануы бек мүмкін.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!