Мәжілісмендер үкіметтен аталық және аналық ұрықтың жалғыз бір ғана базасын құруды сұрап отыр.

Ал база құрылса, экодонорлықты бақылау тиімді болады. Елімізде заң бойынша 35 жасқа дейінгі ер адам анонимді түрде донор бола алады. Бастысы, дені сау, дене бітімі қалыпты дамыған, генетикалық сараптамасы жақсы болуы шарт. Сондай-ақ сауалнамада жүзі, руы, бойы, салмағы, мамандығы көрсетілуі тиіс. Ер адам өзінің ұрығын қанша рет тапсырғысы келеді – өз еркі, еш шектеу жоқ.

Депутаттар донор болудың шегін енгізу керек деп есептейді. Мәселен, ер адам бір рет қана донор болып, ал оның ұрығын екі әйелге ғана қолдану қажет. Соның арқасында елде ауру балалардың да саны азаюы мүмкін.

Бекболат Тілеухан, Мәжіліс депутаты:

- Статистикаға сенсек, жыл сайын тек бір клиникада дәл осы жолмен 70 бала дүниеге келеді екен. Бұл – ертең еліміздің түкпір-түкпіріндегі қаншама отбасында бір әкеден қаншама бала тарайын деп отыр. Ертең ол бір-біріне үйленуі мүмкін. Басқа болуы мүмкін. Бажайлап айта берудің өзі мына сауалда ыңғайлы емес. Бір әкеден тараған жандардың бір-біріне үйленуінің алдын алу үшін, ауру балалардың санын азайту үшін – бұл мәселе өте маңызды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!