Бұл аздай, жауын жауса шатырдан су сорғалап, жоғарғы қабаттағы пәтерлерді көл қылады екен. Ауласы астаң-кестең, аяқ алып жүру де мүмкін емес.  

Тұрғындар мұнда қоныс тойын тойлаймыз деп келіп, бармақ тістеп қалған. Пәтерге «7-20-25» бағдарламасымен әрең дегенде қол жеткізіпті. Алайда  үйлері сапасыз салынған болып шықты. Әсіресе тұрғындарды жертөледегі жағдай қатты алаңдатады. Онда тобықтан келер су жиналған.

Бибігүл Атабекова, Алматы қаласының тұрғыны:

- Осы жердің жерасты суы жақын орналасқан болуы керек. Егер ол су көтерілетін болса, онда үйдің бәріне зақым келеді, іргетасы арқылы, іргетасы шіріп кетуі де мүмкін. Көп нәрсе ойластырылмаған. Баланың, қарт кісілердің жағдайы.

Ал жауын жауса шатырдан су сорғалап, жоғарғы қабаттағы пәтерлерді көл қылады. Ауладағы жағдай, тіпті адам көргісіз. Жаңа төселген асфальт опырылып, шұңқырлар пайда болыпты. Ал балалар ойнауы тиіс алаңның түрі адам шошырлық. «Восточкадағы» түйткілді мәселе мұнымен бітпейді.

Самал Жексенова, Алматы қаласының тұрғыны:

- Әжетханадан өзінен-өзі нәжістің иісі шығады. Қанша жерден жуып тазаласаң да, нәжістің иісі шығып тұрады. Жасап жатқан құрылғылардың бәрі дұрыс емес сияқт. Шақырсаң, келмейді.

Құрылыстың инвесторы аты дардай Samruk-Kazyna Construction компаниясы екен. Олардың бұл үйлерді қалай қабылдап алғаны түсініксіз. Ең қызығы, «бүгін тілшілер келеді» дегенді естіп, коммуналшылар тұрғын үй кешенін дереу жөндеуге кірісіпті. Сөзіне сенсек, құрылыс компаниясы олқылықтарды жақын арада жояды-мыс.

Арыстан Ырысаев, «Восточка» тұрғын-үй кешенін басқарушы компанияның директоры:

- Құрылыс компаниясы 15-мамырға дейін бәрін қалыпқа келтіруді мойнына алды. Қазір жөндеу жүріп жатыр. Шатырды бітеп, жертөлені ретке келтірудеміз. Жағдай бақылауда.

Тұрғындар құрылыстағы кемшіліктер тез арада жойылса дейді. Ал жағдай осылай жалғаса берсе, пәтерлерінің несиесін төлеп бітпей жатып, үйлердің үйіндісі ғана қалуы мүмкін.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!