Тепсе темір үзетін азамат кінәлілерді жазалау үшін түрлі қиындықты  еңсеріп, атағы жер жарған қылмыстық топқа қарсы шығады. Экшн жанрындағы кинотуынды атыс-шабыс пен шым-шытырыққа толы.

«Аға» фильмі атыс-шабыс мен экшн жанрында түсірілген. Кинодағы шым-шытырыққа толы оқиға желісі алғашқы минуттардан-ақ көрерменді баурап алады. Қауіп төндіретін тосын жайттар, ұр да жық көріністер мен қарулы қақтығыс киносүйерқауымды жалықтырмайтыны анық.

Фархат Серкебаев, режиссер:

- Сценарийді бұрыннан ойластырып жүрдім. Алғашқы киномды экшн жанрында түсіргім келді. Енді, міне, мақсатым орындалды. Өте қуаныштымын. Актерлар мен осы фильмнің шығуына ат салысқандарға айтар алғысым шексіз. Көрерменнің көңілінен шығады деп ойлаймын. Көруге кеңес беремін.

Фильм Бақытжан есімді қайтпас қайсар жігіттің басынан өткізген оқиғасымен басталады. Қылмыстық топтың баскесері өткенін ұмытып жаңа өмір бастамақ болады. Тіпті ну орманға кетіп, туыстарынан жырақта жүреді. Бірақ жалғыз інісінің өлімінен кейін ол қолын қайтадан қанға малады. Ашынған ағаның мақсаты – кінәлілерден кек алу. Жолын кескен қаскөйлерді басты рөлді сомдаған Мұрат Бисенбин аямайды. Інісін азаптап өлтіргендерді жазалауға бар күш-жігерін жұмсайды. Фильмде «Үш жүз» деп аталатын қылмыстық топ өкілдері сатқындарды тезге салып, өздері шығарған ортақ заңға бағынады.

Болат Әбділманов, актер:

- Экшн болғанда үш жүздің бірігуі. Үш жүздің әр өкілі бүкіл қазақтың тұтастығы. Қылмыс, тәртіпсіздік жасайтындарды айыптайды. Фильмде тарих пен бүгінгі күннің көрінісі ұштасқан. Мұнда арғы жағында үлкен ой бар. Енді бағасын беретін тек көрермен.

Фильмде белгілі ресейлік актер Александр Устюговтің де шеберлігіне тәнті боласың. Танымал отандық актерлерді жаңа қырынан танып, экшнға толы кино көргің келсе, кинотеатрға асығыңыз. Баянауыл өңірінде түсірілген «Аға» фильмі бүгіннен бастап көрсетіледі.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!