Өрт лап қойғанда бар дүние- мүлкін тастап қашқандардың бірі – Анна Исинева. Қас-қағым сәтте қарқыны қатты қызыл жалын оның баспанасын жермен-жексен еткен. Далада қалған отағасы екеуі қазір қонақ үйді паналауда. Бір сәтте бәрінен айырылған отбасы тек бір қабат киіммен қалған.

Анна Исинева, Риддер қаласының тұрғыны:

- Жұмыстан келіп тынығып жатқам.  Балаларым мен жолдасым әлі үйге келмеген. Оянып далаға қарасам, айнала түгел жанып жатыр. Тек құжаттарды ғана алып үлгердім.  Нан-пұлға деген ақшамыз да жанып кетті. Жұрт болып бізге қолдау білдіріп жатыр. Бәріне рақмет!

Тілсіз жаудан 83 адамның далада қалғаны анықталды. Дегенмен оларға жан-жақты қолдау көрсетілуде. Жергілікті тұрғындармен қатар еліміздің әр өңірі көмек қолын созуда. Алғаш болып азық-түлік пен киім-кешек толы гуманитарлық көмек Керекуден жеткізілді. Өзге қалалардан да қайырымдылық керуені жолға шыққан.

Сұңқар Асқаров, Риддер қаласының агротехникалық колледжінің директоры:

- Қала тұрғындары және облыс аумағынан көптеген жерлерден көмек қолын созып жатыр. Бүгінгі таңда  азық-түлік, киім-кешектің мол қоры  жиналды. Қазір белсенділердің көмегімен реттеліп берілуге дайын.

Әзірге азық-түлік 30-ға жуық отбасына таратылды. Ал киім-кешекті әркім өзіне керектісін таңдап алуда. Еріктілер тілсіз жаудан зардап шеккендерге қолдау білдіруге ниеттенген қайырымды жандардың қатары қалың екенін жеткізді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!