Ақтөбенің орман шаруашылығына қарайтын тоғай осыдан бір апта бұрын жап-жасыл еді. Ал қазір жапырақтардан түк қалмаған. Ел арасында «көбелек құрты» деп аталатын зиянкес түгел отап тастапты.

Ағаш бұталары құжынаған құрттан көрінбейді. Түкті зиянкес әсіресе көктерек жапырағына өш. Бір талдың жапырағын айналдырған жарты сағатта жоқ қылады. Түкті қырықбуын Мәртөк ауданындағы Родниковка, Березовка ауылы маңындағы тоғайлардың жартысын отап тастаған. Қаптаған құртты көрген бойда орманшылар құзырлы мекемелерге хабар бердік дейді.  

Қуантхан Тастыбаев, орманшы:

- Мынандай бір құрт шықты. Шамалы басталған кезі. Бұрын ондай болмайтын. Бір жетінің ішінде жапырағын құртып жатыр. Уламаса, жайылып жей береді. Білмеймін, бірінші рет көріп тұрмын.     

Құрттың қаптауына қуаңшылық пен аптап ыстық себеп болған. Енді бірер күнде уламаса, аймақтағы жасыл желектің түгі қалмайды деп отыр мамандар. Ал қазынадан оған қаражат қарастырылмапты.

Роман Титов, Ақтөбе облысы орман шаруашылығының инженері:

- Зиянкестерді улауға қаржы қарастырмаған едік. Өйткені соңғы 15 жылда мұндай жағдай облыста тіркелмеді. Енді акті, хаттама толтырып, республикалық бюджеттен сұрап жатырмыз. Екі-үш күн ішінде уламаса, құрт дернәсілін тастап үлгереді және жайылып кетуі мүмкін.

Жұлдызқұрт кейін көбелекке айналады. Ал ағашқа дернәсілін ұялап тастаса, кейін одан 1500 құрт пайда болады. Ал орман-тоғайды қолмен улау мүмкін емес, ұшақпен химиялық қоспа себу керек.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!