Ақ халаттылар «Музвакты» «Астана кештері» халықаралық өнер фестивалінде алды. Елордада осымен 10-шы рет ұйымдастырылған кеш «Дегдар» қоры мен JTI компаниясының қолдауымен өткізіліп отыр.

«Астана кештерінің» 10 жылдық мерейтойы коронавируспен күресте алдыңғы шепте жүрген ақ халатты абзал жандарға арналды. Жыл он екі ай қауіпті індетпен күресіп келе жатқан оларға ұйымдастырушылар музыкалық вакцина, яғни музыка арқылы көңіл-күйлерін көтеріп, құрмет білдіргісі  келген.

Лаура Ахметова, «Дегдар» гуманитарлық қорының директоры:

- Фестивальдің соңғы концертіне «MuzVac  үздік музыкалық вакцина» ұраны арқау болды. Біз көрермендерімізді өмірге қайта ғашық қылуға, олардың көңіл күйін, рухани иммунитетін көтеруге тырыстық. Бұл Жер шарындағы әрбір азаматқа әсер еткен қайғылы жағдайларға қарамастан, өмір жалғасуда. Фестиваль де әрі қарай жалғаса береді. Біз 2022 жылы «Астана кештері» 11-ші фестивалінің де ашылуын асыға күтеміз.

Былтыр пандемия кесірінен өтпей қалған «Астана кештерін» жұрт әбден сағыныпты. Өнерге сусаған көрерменге халықаралық өнер фестивалінің алғашқы күнінде италиялық, швециялық музыканттар өнер көрсетті. Ал екінші концертте өнерсүйер қауым Германия пианисінің шығармашылығына тәнті болды. Гала-концертте халық ABBA, Queen топтарының шырқалған атақты әндерін бір деммен ұйып тыңдады.

Көрермен:

- Керемет! Қатты қуандық. Осындай фестивальдердің қайтадан жаңғырып, пандемиядан кейін басталғанына қуаныштымыз. Осындай көп болсын. Пандемия тез өтіп кетсін.

Уақытының тығыздығына қарамастан еліміздің бас дәрігері Алексей Цой да көрермен ретінде келіпті.

Алексей Цой, ҚР Денсаулық сақтау министрі:

- Біз мәдениет қызметкерлері атына дәрігерлерге осындай құрмет көрсеткені үшін ризамыз. Әсіресе коронавируспен күресте өмірден өткен азаматтарымызды еске алғандарына, қазіргі сәтте науқастардың өмірі үшін күресіп жатқан ақ халатты абзал жандарымызға көрсеткен сыйларына ризамыз.

Коронавирус пандемиясына байланысты «Қазақстан» концерт залы бұрынғыдай толы болмады. Арақашықтық сақталып, көрермендер барынша санитарлық талаптарды бұзбауға тырысты.

«Астана кештерін» биыл 15 жылдығы аталып өтетін Астана күнін мерекелеу аясында «Дегдар» қоры ұйымдастырған.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!