Балаларды сыртқа шығаруға қорқып қалған ағайын соңғы уақытта екі хостел қонақтары топтасып жанжалдасатынын айтады. Пәтер иелері мен кәсіпкерлерден күдерін үзген тұрғындар әкімдік өкілдері де қол қусырып қарап отыр дейді.

«Күндіз күлкі, түнде ұйқыдан қағылдық» деп мұң шаққандар ауламызда өгейдің күйін кешіп жүрміз дейді. Тұрғындардың айтуынша, екі бірдей көпқабатты үйдің жертөлесіндегі хостел нағыз жын-ойнақтың ордасына айналыпты.  Әсіресе ащы суға тойып алып түнемек іздейтіндер осы хостелдерді көбірек төңіректейтін көрінеді.    

Ботагөз Қалиева:

- Кешкі сағат 10, 11-ден кейін төбелес басталады. Жиналады, осы жерде айқай-шу. Сенбі-жексенбі күндері  жартылай денесі жалаңаш мына жерде отырады. Біз балаларды сыртқа шығара алмаймыз.

Тұрғындардың айтуынша, жертөленің іші-сыртында санитарлық талап сақталмайды. Бір күндік қонақтар маңайды қоқыс пен темекі тұқылына толтырып тастаған. Дүрліккен жұрт бір күні өртеніп кетеміз бе деп үрейленеді. Ең сорақысы, екі хостелдің қонақтары соңғы кездері бір-бірімен топтасып төбелесуді шығарыпты.

Гүлмира Жақсылыққызы:

- Екі жақ бірігіп алып есік алдында төбелесіп жүр. Кеше төбелескенде кішкентай балалар жан-жаққа шыңғырып қашып бара жатыр да. Сұмдық, үрейімізді ұшырды. 

Ботагөз Қалиева:

- Бір емес, төрт негр жүр мынаның ішінде. Сұрасақ, әкімшілік пе, білмейміз кім екенін. «Не понимать, не понимать» дейді, одан басқа ештеңе айтпайды.

Есігі аулаға қараған хостелден тілдесетін жан таппадық. Іштен құлыпталған есік сол күйі ашылмады. Ал келесі жертөлеге кіргенімізде тұрғындардың уәжі расқа айналды. Алдымыздан шыққан шетел азаматы сөйлеспек түгілі, тілшілерге тұра ұмтылды.

Ушыққан мәселеге учаскелік полицейлердің араласуына тура келді. Тәртіп сақшылары аталмыш хостелдерге қатысты шағым көп түсетінін мойындайды. Ал «жертөле біздің келісімді алмай сатылды» деген тұрғындар бәріне Пәтер иелері кооперативі кінәлі деп есептейді. Алайда кооператив қызметкерлері өздеріне шаң жуытпады. 

- Хостелдер бізге қарамайды. Жекеменшік. Иелері бар. Тұрғындар ешқандай біздің келісімінсіз сатылған дейді ғой. Оған біз жауап бере алмаймыз.

Ал тұрғындар бір көруге зар болған хостел иесінің біреуі ақыр соңында байланысқа шығып мән-жайды түсіндіруге тырысты. Жертөледе кәсібін дөңгелеткен әйелдің айтуынша, құжатында кінәрат жоқ. «Заң аясында жұмыс істеймін» деген ол, тұрғындардың жанайқайы негізсіз дейді.

Алла Кобзарь, кәсіпкер:

- Тұрғындардың пайымынша, біз жертөлені заңсыз иеленіп отыр екенбіз. Тіпті Пәтер иелері кооперативі жалға берген деген қауесет таратып жатыр. Мұның бәрі шындыққа жанаспайды. Бұл ғимаратты 2015 жылы құрылыс жүргізген компаниядан сатып алдық. Барлық құжат тексеруден өткізілген.

Ал мораторийға байланысты тексеру жүргізе алмаймыз деп ақталған шенеуніктер шағым айтқандарға сотқа жүгінуге кеңес береді. Бір қызығы, кәсібіме кедергі келтірді деген хостел иесі де тұрғындарды сотқа тартуға оқталып жүр. Демек тұрғындар мен шулы қонақтардың дауы әлі талай уақытқа созылуы мүмкін.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!